Pavlodar oblysynda áıelin uryp óltirgen er adam qamaýǵa alyndy
PAVLODAR. QazAqparat - Baıanaýyl aýdanyndaǵy sharýa qojalyqtarynyń birinde otbasylyq janjal kezinde kúıeýi áıeli esinen tanyp qalǵansha uryp, oǵan kóptegen dene jaraqatyn salǵan, dep habarlaıdy Pavlodarnews.kz.
Pavlodar oblystyq polıtsııa departamentiniń habarlaýynsha, oqıǵa 17 tamyz kúni bolǵan.
«Aıaýsyz soqqynyń saldarynan áıel jedel járdem qyzmeti kelgenge deıin qaıtys bolǵan. Atalǵan fakti boıynsha QR QK 106 - baby 3-bólimi boıynsha sotqa deıingi tergeý júrgizilýde», - dep habarlady Pavlodar oblysy polıtsııa departamenti bastyǵynyń birinshi orynbasary Jasqaırat Qaıyrov.
Tártip saqshylary qazirgi tańda kúdiktiniń ustalǵanyn, onyń Baıanaýyl aýdanyndaǵy ýaqytsha ustaý ızolıatorynda qamaýǵa alynǵanyn atap ótti.
Aıta ketý kerek, aǵymdaǵy jyldyń basynan beri aımaqta jábirlenýshilerdiń ólimine ákep soqqan dene jaraqatyn salýdyń 13 faktisi tirkelgen.
