Pavlodar oblysynda aıazda kóligi synyp qalǵan jolaýshylar qutqaryldy
PAVLODAR. QazAqparat - Pavlodar oblysynda aıazda kóligi synyp qalǵan jolaýshylar qutqaryldy, dep habarlaıdy QazAqparat Pavlodarnews.kz saıtyna silteme jasap.
Oblystyq polıtsııa departamentinde polıtsııa men tótenshe jaǵdaılardyń kóptegen eskertýlerine qaramastan, keıbir kólik júrgizýshileri alys jolǵa shyǵatynyn aıtady. Saldarynan tómen aýa temperatýrasyna tótep bere almaǵan avtokólik isten shyǵady.
- 2021 jylǵy 9 qańtarda saǵat 07.30 shamasynda Dostyq aýylynan Chernoretsk aýylyna óz ákimshilik ýchaskemdi aralap shyqqan edim. Omby - Maıqapshaǵaı avtojolynda «Nıssan» avtokóligin baıqadym. Pavlodar qalasynyń eki turǵyny Tereńkól aýdanyna qonaqqa bara jatqan, biraq jolda kólik buzylyp qalǵan. Júrgizýshi óz betinshe sebebin anyqtaı almady. Jel men qatty aıaz kólik ishin sýytyp jibergen, - deıdi Pavlodar aýdanynyń ýchaskelik polıtsııa ınspektory Dáýren Qabyshev.
Jolaýshylar kólik kenetten buzylyp, toqtap qalǵanyn, biraz ýaqyt turǵannan soń tońa bastaǵandaryn jáne óz kúshterimen aıaz bolǵandyqtan jóndeı almaǵandaryn aıtady.
- Tas jolda kólikter júre qoımady, al júrgender toqtamady. Shamamen bir saǵattan keıin tońyp, esh nárse isteı almaıtynymyzdy túsindik. Sol kezde polıtsııa qyzmetkeri kele qaldy. Ol avtokólikti tirkep súıreýge alýǵa sheshim qabyldady. Chernoretsk aýylyna deıin súırep apardy. Polıtsııa qyzmetkeri kólikti óz aýylynda qaldyryp, bizdi jol boıynda ári qaraı baratyn jerimizge otyrǵyzyp jiberdi. Demalystan keıin biz týystarymyzben kelip, kólikti alyp kettik. Bizge kómekteskeni úshin Dáýren Qabyshevke rızamyn jáne barlyq polıtseılerge densaýlyq pen sáttilik tileımin, - deıdi óz rızashylyqtaryn bildirgen pavlodarlyqtar.
