Pavlodar oblysynda aýyzsýǵa qoljetimdilik 23,8%-ke deıin artty

PAVLODAR. QazAqparat - Pavlodar oblysynda 2017 jyly 23 aýyldy aýyzsýmen qamtýǵa 10 mıllıard teńge qarjy bólindi, dep habarlaıdy QazAqparat.

«10 myńnan astam turǵyn sapaly aýyzsýmen qamtyldy. Bul ortalyq sýmen qamtý júıesine qoljetimdilikti 19,5%-ten 23,8%-ke jetkizdi», - deıdi turǵyndarmen kezdesken oblys ákimi Bolat Baqaýov.

Onyń sózine sensek, birneshe jyldan beri óńir basshylyǵy turǵyndardy sapaly aýyzsýmen qamtý máselesine basty nazar aýdaryp keledi. Úkimettiń, Senat jáne Májilis depýtattarynyń kómegimen respýblıkalyq bıýdjetten 2017 jyly 23 aýylda turǵyndardy aýyzsýmen qamtý jobalaryn júzege asyrýǵa 10 mlrd teńge bólinip, jalpy uzyndyǵy 360 kılometr bolatyn qubyr jatqyzyldy.

2017 jyly kóp jyldardan beri sheshimin tappaı kelgen Belovod arnasynyń (Aqsý) qurylysy aıaqtaldy.

Ertis aýdanynyń bes aýylynda sý qubyrlaryn tartý bastaldy.

«Bıyl kóp jumys atqarylady. Qazirgi jobalardy qosqanda 25 sý qubyryn tartý jumysy júzege asyrylady. Qazir qosymsha túrde taǵy da toǵyz jobaǵa qarjy bólý máselesi qarastyrylyp jatyr», - dedi ákim.