Pavlodar oblysynda aýyl turǵyndarynyń sany 34 myńǵa azaıǵan
PAVLODAR. QazAqparat - Pavlodar oblysynda sońǵy 10 jyl ishinde elden qalaǵa kóshkender sany kóbeıip otyr, dep habarlaıdy pavlodarnews.kz.
Qazirgi kezde óńirde aýylda turatyn halyq úlesi nebári 30%. Qazaqstanda bul kórsetkish 42%-dan artyq. Bul týraly Pavlodar oblysy Qazaqstan fermerler odaǵynyń esep berý-saılaý konferentsııasynda «Pavlodar» áleýmettik-kásipkerlik korporatsııasy aýyl sharýashylyǵyn damytý máseleleri jóninde bóliminiń basshysy Vladımır Berkovskıı málimdedi.
«Tájirıbe kórsetkendeı, ýrbanızatsııadan eshqaıda qashyp qutyla almaısyń... Sondyqtan bul úderisterdi basqarýymyz qajet»,-deıdi Vladımır Berkovskıı.
Onyń pikirinshe, aýyl-aımaqtan bilimdi, jas, bastamashyl adamdardyń kóship ketýi aýyldyń ekonomıkalyq toqyraýyna ákep soqtyrady. Halyqtyń aýyldan qalalarǵa qonys aýdarýynyń negizgi sebebi - zamanaýı turmystyq jaǵdaıdyń bolmaýy. Tereńkól aýdanynda birqatar áleýmettik mańyzy bar nysandardyń qoldanysqa berilýiniń arqasynda bul aýdanda aýyl turǵyndarynyń sany azaımaǵan. Máselen, bul aýdanda jyl saıyn úsh myń sharshy metr baspana salynyp, jumys oryndary ashylýda.
- Aýyldyqtar ózderine yńǵaıly jaǵdaı izdeıdi. Olar úılerinde ortalyq sý jáne jylýmen qamtý júıesi men jyly ájethana bolǵanyn qalaıdy. Osy oraıda biz alǵa qaraı zor qadam basqanymyzdy ataý kerek. Desek te, aýylda ortalyq jylý júıesi tek Galıtskoe aýylynda ǵana bar, - deıdi Vladımır Berkovskıı.
Osy máseleni sheshý úshin «Pavlodar» áleýmettik-kásipkerlik korporatsııasynyń ókili aýyldy elektr energııasynyń kómegimen jylytýdy usyndy. Óıtkeni oblysta energııalyq qýat jetkilikti.
