Pavlodar oblysynda aýrýhana esepshileri jazalandy

PAVLODAR. QazAqparat - Memlekettik satyp alý zańyn buzǵany úshin olar tártiptik jaýapkershilikke tartyldy, dep habarlaıdy QazAqparat Pavlodarnews.kz saıtyna silteme jasap.

Birneshe medıtsınalyq mekemeniń qyzmetkerleri kásipkerlerge kelisimsharttyq qujattardy qaıtarmaǵan.

Bul týraly oblystyq sybaılas jemqorlyqqa qarsy is-qımyl departamenti málimdedi.

«Memlekettik satyp alý portalynyń monıtorıngi barysynda taldamalyq jolmen 6 medıtsına mekemesi kásipkerlerge jalpy somadan qamtamasyz etý sheńberinde engizilgen shartty 3% mólsherindegi aqshalaı qarajatty qaıtarmaǵany anyqtaldy», - dep atap ótti vedomstvoda.

Osyndaı medıtsınalyq uıymdardyń qatarynda Jelezın, Baıanaýyl, Aqtoǵaı, Aqqýly aýdandary aýrýhanalary, Aqsý qalalyq aýrýhanasy bar.

Departament isti baqylaýǵa alǵannan keıin 10 kásipker ózderine tıesili aqshany qaıtaryp aldy.