Pavlodar oblysynda aýany lastaǵandarǵa 2 mln teńgeden astam aıyppul salyndy
PAVLODAR. QazAqparat - Bıyl Pavlodar oblysynyń iri kásiporyndary tabıǵatty qorǵaý sharalaryna 13,7 mlrd teńge bólgen, dep habarlaıdy pavlodarnews.kz.
Bul týraly óńirlik kommýnıkatsııalar qyzmetinde ótken baspasóz jıynynda Pavlodar oblysy ekologııa departamentiniń basshysy Danııar Álıev málim etti.
Pavlodar qalasynda departamentimiz «Pavlodar oblysynyń azamattyq alıansy» qaýymdastyǵy» zańdy tulǵalardyń birlestigimen birlese oblys turǵyndaryna ekologııalyq máseleler boıynsha óz pikirin bildirip, olardy ashýǵa múmkindik beretin «Ashyq esik kúnin» ótkizdi. Bul shara álemdik qaýymmen jyl saıyn 5 maýsymda ótkiziletin Álemdik qorshaǵan ortany qorǵaý kúnine arnalǵan. Mereke 1972 jyly BUU Bas Assambleıasynyń 27-sessııasynda jarııalanǵan. 2019 jyldyń taqyrybyn BUU «Aýanyń lastanýymen kúres» dep jarııalady. Bul kúndi atap ótýdegi maqsat - merekeli ótkizý árbir adamda qorshaǵan ortany qorǵaýǵa degen yntasyn týdyrý. «Ashyq esik kúni» sharasynda turǵyndar kógaldandyrý men jasyldandyrý, aǵashtardyń kesilýi, belgili jóndeý jumystarynan keıin joldardyń qalypqa kelmeýi jónindegi máselelerdi kótergen. Departament basshysynyń aıtýynsha, ınspektsııalyq qyzmet ekologııalyq máseleler boıynsha 14 tekserý jumystaryn jasaǵan. - Onyń 4-i josparly, 10-y josparsyz tekserý boldy, - dedi Danııar Álıev. - Nátıjesinde 2 mıllıon 278,9 myń teńgege 42 aıyppul salyndy. Onyń 2 mıllıon 50,7 myń teńgelik 39 aıyppuly óteldi. Jalpy, 2019 jyldyń birinshi toqsanynda atmosferaǵa 344,8 myń tonna zııandy zat shyǵarylǵan. Óńirimizdegi iri kásiporyndar tabıǵatty qorǵaý sharalaryna 13,7 mıllıard teńge bólip, tıisti sharalardy atqarýda.
Aıta keteıik, «Qazgıdromed» RMK ulttyq operatory atmosfera tazalyǵyna baqylaý júrgizedi. Jezqazǵan, Qarataý, Qaraǵandy - eń las qala sanalsa, Pavlodar qalasy tizim boıynsha 33-orynda. Aqsý - 31, Ekibastuz 36-orynǵa jaıǵasqan.
