Pavlodar oblysynda atty polıtsııa qurylady
PAVLODAR. QazAqparat - Pavlodar oblysynda 2018 jyly atty polıtsııa qurý josparlanýda, dep habarlaıdy «QazAqparat» HAA tilshisi.
«Tabıǵı jaǵdaı boıynsha avtokólikterdi qoldaný qıynǵa soǵatyn jerlerde, atap aıtqanda saıajaı aýdandarynda jáne azamattardyń demalatyn aımaǵynda qoǵamdyq tártipti qamtamasyz etý úshin kúzde jáne kóktemde atty polıtsııa qurý josparlanýda», - dep habarlady oblystyq ishki ister departamentiniń baspasóz qyzmeti.
Sondaı-aq, polıtsııa bıyl iz-túzsiz joǵalǵan adamdardy, maldardy, urlanǵan kólikterdi izdeý úshin Pavlodar oblysyndaǵy aýyldarda kvadrokopterlerdi qoldanbaq. Sondaı-aq, bul kóktemgi sý tasqynyn baqylaýǵa múmkindik beredi.
Túrli quqyqbuzýshylyqtar basqa jyl mezgilderine qaraǵanda jazda kóbirek bolatyny atalyp ótti.
«Sýdaǵy jáne jaǵalaý aýmaǵyndaǵy quqyqbuzýshylyqtarǵa jedel áreket etý úshin bıyl gıdrotsıkl, shaǵyn keme, qarda júretin tehnıka qoldaný josparda bar», - dep atap ótti ІІD-de.
Foto:kstnews.kz
