Pavlodar oblysynda asyq atý úıirmeleriniń sany 200-ge jýyqtady

ASTANA. QazAqparat - Pavlodar oblysynda Elbasynyń «Rýhanı jańǵyrý» baǵdarlamasy sheńberinde bıyl asyq atý úıirmeleriniń sany 179-ǵa jetken. Byltyrǵy jyly mundaı úıirme sany 93 bolǵan, dep habarlaıdy pavlodarnews . 

«Joba masshtabty sıpatty ıelenip, oqýshylar men eresekter arasynda úlken qyzyǵýshylyq týdyrdy. Oqýshylar jaz kezinde asyq jınap, atalmysh jobany iske asyrý  óńirdiń jalpy bilim beretin mektepterinde qolǵa alyndy. Sonymen qatar, jobany engizýge mektepke deıingi mekemeler de belsendi  qatysqan. Búgingi kúni «Asyq party» aktsııasy Pavlodar qalasy, Kachır, Lebıaji jáne Aqtoǵaı aýdandarynyń balabaqshalarynda uıymdastyrylǵan. Mektepke deıingi uıym tárbıeshileri tárbıelenýshilerdiń ulttyq oıynǵa asa qyzyǵýshylyq tanytqandaryn aıtýda», - deıdi oblystyq bilim berý basqarmasy qosymsha bilim berý jáne tárbıe jumysy jónindegi bóliminiń bas mamany Qýanysh Qydyralın.

Bas mamannyń aıtýynsha, úıirmelerdegi oqýshylar sany 1950-den  3477-ge deıin artqan.  Aǵymdaǵy jyly alǵash ret «Asyq atý» oıyny boıynsha oblystyq jarystar uıymdastyrylyp, jeltoqsannyń birinshi on kúndiginde barlyq bilim berý uıymdarynda mektepttik týrnırler, jattyqtyrýshy muǵalimder úshin sporttyń atalǵan túrin oqytý jáne sheberlikterin arttyrý boıynsha semınar-praktıkým  ótti. Jeke jáne komandalyq esepte jeńimpazdar anyqtaldy.

Jobanyń  maqsaty «Asyq atý» mektep lıgasyn uıymdastyrý, sporttyń atalǵan túrin 2020 jyly oqýshylardyń oblystyq spartakıadasynyń baǵdarlamasyna engizý bolyp tabylady.