Pavlodar oblysynda asa iri kólemde marıhýana tárkilendi

PAVLODAR. QazAqparat - Ekibastuz qalasynda arnaıy operatsııa barysynda esirtki tasymaldady degen kúdikpen er adam ustaldy, dep habarlaıdy QazAqparat Pavlodarnews.kz-ke silteme jasap.

Oblystyq polıtsııa departamenti baspasóz qyzmetiniń málimeti boıynsha, atalǵan faktige qatysty Qazaqstan Respýblıkasy QK-niń 296-babyna sáıkes sotqa deıingi tergeý amaldary júrgizilýde.
- Jedel izdestirý is-sharalarynyń nátıjesinde esirtki qylmysyna qarsy is-qımyl bóliminiń qyzmetkerleri «Toyota Carina» markaly avtokóliginiń salonynan erekshe ıisi bar ósimdik tektes zat salynǵan polıetılen paket pen úsh brıket aldy. Saraptama qorytyndysy boıynsha tárkilengen zattyń salmaǵy 12 keliden asatyn keptirilgen marıhýana ekeni anyqtaldy, - dedi Pavlodar oblysy polıtsııa departamenti bastyǵynyń orynbasary Jasqaırat Qaıyrov.

Kúdikti, Ekibastuz qalasynyń 25 jastaǵy turǵyny qamaýda otyr.