Pavlodar oblysynda anasyna dóreki sóılegen jigit jaýapqa tartyldy
Pavlodar oblysy polıtsııa departamentiniń baspasóz qyzmetiniń málimdeýinshe, mundaı otbasylyq janjaldar jıi kezdesedi.
Máselen, 6 qazan kúni Ýspen aýdany aýyldarynyń biriniń turǵyny tártip saqshylarynan shuǵyl túrde kelip, úıde janjal týdyryp jatqan ulyn tynyshtandyrýdy suraıdy.
Tártip saqshylary ótinish berýshiniń 27 jasar uly úıge mas kúıinde kelgenin anyqtady. Ol anasyna daýys kóterip, dóreki sóılep, qarǵys jaýdyra bastaǵan. Ulynyń mundaı áreketinen shoshyp qalǵan anasy kóz jasyna erik berip, mundaı jaǵdaıdyń birinshi ret oryn alǵanyn aıtqan. Sondaı-aq, áıel ulynyń qosymsha jumys istep, qalypty ómir súretinin jetkizgen.
«Jas jigit polıtsııa bólimshesine jetkizilip, ótkizilgen medıtsınalyq kýálandyrý onyń ortasha deńgeıde mas ekenin kórsetti. Aýyl turǵynyna qatysty QR ÁQBtK-niń 73-baby boıynsha ákimshilik hattama toltyrylyp, materıal qaralý úshin sotqa jiberildi», - dedi Ýspen aýdany polıtsııa bólimi bastyǵynyń birinshi orynbasary Arman Ashrenov.
Aıta ketelik, aǵymdaǵy jyly Pavlodar oblysynyń 2800-den astam turǵyny otbasylyq-turmystyq qatynastar salasyndaǵy quqyqqa qaıshy áreketteri úshin ákimshilik jaýapkershilikke tartyldy.