Pavlodar oblysynda «Altyn belgige» úmitkerlerdiń bireýi ǵana senimdi aqtamady
ASTANA. QazAqparat - Pavlodar oblysynda «Altyn belgige» úmitker 146 mektep bitirýshisiniń 145-i nemese 99,3 paıyzy óz bilimderin rastady.
Bul týraly óńirlik kommýnıkatsııalar qyzmetinde «Mektep bitirýshilerin qorytyndy attestattaý jáne 2017 jylǵy UBT-ny ótkizýge daıyndyq» taqyrybynda ótken baspasóz máslıhatynda oblystyq bilim berý basqarmasy bilim berý monıtorıngi bóliminiń basshysy Roza Baltabekova málim etti, dep habarlaıdy pavlodarnews.kz .
-Óńirdegi mamandandyrylǵan jáne qalalyq mektepterdiń «Altyn belgige» úmitkerleriniń barlyǵy derlik óz bilimderin rastap shyqty, - deıdi Roza Baltabekova. - Tek Baıanaýyl aýdany Á.Marǵulan atyndaǵy orta mekteptiń bir túlegi bul nátıjege qol jetkize almady. Úzdik attestatqa úmitker bolǵan 133 mektep bitirýshisiniń barlyǵy da úmitti aqtady. Qanaǵattanarlyq emes degen baǵa joq. 11-synyptar úshin bıyl ana tili men ádebıeti boıynsha esse túrindegi jazbasha emtıhan 29-mamyrda, tańdaý páni boıynsha (fızıka, hımııa, bıologııa, geografııa, geometrııa, shetel tilderi (aǵylshyn, frantsýz, nemis tilderi), dúnıe júzi tarıhy, ádebıet, ınformatıka) jáne orys tilinde bilim beretin mektepterde qazaq tilinen jáne qazaq tilindegi mektepterde orys tilinen testileý 2 maýsymda, algebra jáne analız bastamalary páni boıynsha baqylaý jumysy 6 maýsymda ótti. Aıta keterligi, 9 maýsymda alǵash ret Qazaqstan tarıhy boıynsha oqýshylar aýyzsha emtıhan tapsyrdy.
Sondaı-aq óńirde qorytyndy attestattaýǵa barlyǵy 3655 oqýshy qatysqan. QR Bilim jáne ǵylym mınıstrliginiń buıryǵyna sáıkes dárigerlerdiń anyqtamasyn usynǵan 83 oqýshy qorytyndy attestatsııadan bosatylǵan. Olardyń 76-sy - jalpy orta bilim berý mektebiniń, jeteýi - keshki mektepterdiń túlekteri. Bul oqýshylarǵa avtomatty túrde qorytyndy baǵalar qoıyldy.
