Pavlodar oblysynda áleýmettik mańyzy bar 16 nysan boı kóteredi
PAVLODAR. QazAqparat – Oblystyq máslıhattyń 2019 jylǵy sońǵy sessııasynda 2020-2023 jyldarǵa arnalǵan óńirlik bıýdjet qabyldandy, dep habarlaıdy pavlodarnews.kz.
Oblystyq ekonomıka jáne bıýdjettik josparlaý basqarmasynyń basshysy Maqsat Turlybaev atap ótkendeı, respýblıkalyq bıýdjetten túsetin maqsatty transfertterin qosa eseptegende 2020 jylǵa arnalǵan óńirlik bıýdjet kólemi 222,6 mıllıard teńgeni qurady. Bul bıylǵy bıýdjetten 4% artyq.
«Keler jyly áleýmettik salaǵa bólinetin qarajat 27%-ǵa artyp, 76 mıllıard teńgege jetedi. Máselen, 2,7 mıllıard teńge densaýlyq saqtaý salasyna joldanady. Onyń 400 mıllıonyna 50 naýqasqa arnalǵan qymbat baǵaly dári-dármek satyp alynady» , - deıdi Maqsat Turlybaev.
Oblys ákimi Bolat Baqaýov aıtqandaı, jańa bıýdjette turǵyndardyń áljýaz toptaryn qoldaýǵa arnalǵan áleýmettik paket kúsheıtilgen. - Múgedekterdi arnaıy quraldarmen qamtý máselesi erekshe nazarǵa alynǵan. Bıyl múmkindikteri shekteýli azamattarǵa arnalǵan arba máselesin túbegeıli sheshtik. Kelesi jyly sanatorlyq-kýrorttyq em uıymdastyrý, protezder satyp alý jáne ózge de qosalqy quraldardy satyp alýǵa qajet qarajat qarastyrylady, - deıdi Bolat Baqaýov.
Osy joly bizdi Eńbek mınıstrligi qoldap, oblysqa 500 mıllıon teńge bóldi. Jalpy alǵanda osy maqsatqa jumsalatyn qarajat 2,4 esege arttyryldy. Keler jyldan bastap oblystyq bıýdjet «Aýyl – el besigi» jobasy aıasyndaǵy jóndeý jumystaryn qoldap, atalǵan jobaǵa enbegen keıbir aýyldardy ǵana qarjylandyrady.
«Qala men aýdan ákimderi jóndeý jumystaryna ózderi de qarajat izdestirýi tıis. Ol úshin barlyq ákimder salyq jınaý máselesin kúsheıtýi tıis. Kelesi jyly kishi jáne orta kásipkerlikten túsetin korporatıvtik tabys salyǵy qala men aýdan ákimdikterine tapsyrylatyn bolady. Mundaı jańashyldyq ákimderdiń ózderine tıesili aýdandaǵy ekonomıkalyq belsendilikti arttyrýǵa múddeliligin arttyrýy tıis, - deıdi ákim.
Aıta keteıik, keler jyly oblysta áleýmettik mańyzy bar 16 nysan salyna bastaıdy. Olardyń ishinde ıAmyshevo, Esilbaı jáne Aǵashoryn aýyl klýbtary, Moıyldy, Jetekshi jáne Aqsý kentterinde dene shynyqtyrý keshenderi, Tereńkólde hokkeı korty men Sharbaqty men Maıqaıyń aýyldarynda salynatyn stadıondar bar.