Pavlodar oblysynda aldaǵy 3 jylda 10 mektep salynady

ASTANA. QazAqparat – Joldaýda usynylǵan «Jaıly mektep» ulttyq jobasy aıasynda Pavlodar oblysynda aldaǵy 3 jylda 10 mektep salynady. Bul týraly Memleket basshysy Qasym-Jomart Toqaev Pavlodar oblysy jurtshylyǵymen kezdesýinde aıtty, dep habarlaıdy QazAqparat Aqordaǵa silteme jasap.

«Biz barlyq balanyń sapaly bilim alýyna jaǵdaı jasaýymyz kerek. Osyǵan baılanysty men Joldaýda «Jaıly mektep» ulttyq jobasyn júzege asyrýdy usyndym. Bul bastamanyń aıasynda Pavlodar oblysynda aldaǵy 3 jylda 10 mektep salynady. Qurylysty sapaly salyp, ýaqtyly tapsyrý – basty mindet. Jumys barysyn jergilikti atqarýshy organdar qatań baqylaýda ustaýǵa tıis.

Jastar erteń bilimdi, alǵyr, oqýda ozat bolsyn desek, biz búgin kóptep sapaly, jaıly mektep salýymyz kerek. Bul – memleket retinde bizdiń ortaq mindetimiz. Sondaı-aq, ǵylymı qyzmetkerlerdiń qoǵamdaǵy abyroı-bedelin arttyrýymyz qajet. Ǵalymdarymyzǵa álemdegi jetekshi ǵylymı ortalyqtarda taǵylymdamadan ótý úshin jyl saıyn 500 grant berile bastady.

Sonymen birge, «Jas ǵalym» jobasynyń aıasynda 1000 grant bólinetin boldy. Stýdentterdiń, magıstranttar men doktoranttardyń shákirtaqysy birtindep kóbeıip keledi. Ǵylymı ınstıtýttar men irgeli zertteýlerdi qarjylandyrý júıesin jetildirip jatyrmyz. Osyǵan oraı, zańdarǵa tıisti ózgerister engizildi», - dedi Memleket basshysy.