Pavlodar oblysynda ákim jylý trassasynyń qubyryn buzyp áketýge ruqsat bergen
PAVLODAR. QazAqparat - Pavlodar oblysynda aýyldyq okrýg ákiminiń tártiptik jaýapkershilik máselesi Ádep jónindegi keńes otyrysynda qaralady, dep habarlaıdy «QazAqparat» HAA tilshisi.
«Memlekettik qyzmet departamenti Sharbaqty aýdanyna qarasty aýyldardyń biriniń turǵyndarynan túsken ótinish boıynsha tekserý júrgizdi. Ótinishte kórsetilgendeı, 2019 jyldyń qarasha aıynda belgisiz tulǵalar Sharbaqty aýdany aýyldyq okrýgi ákiminiń ruqsatymen aýyldaǵy eski jylý trassasynyń qubyrlaryn buzyp, tıep áketken», – dep habarlady Memlekettik qyzmet isteri agenttiginiń Pavlodar oblysy boıynsha departamentinen.
Tekseris barysynda qubyrlardy buzýǵa qatysty zańsyzdyqtar dálel tapqan.
«Kommýnaldyq menshikke berilgen múlikti esepke alý, saqtaý, baǵalaý, odan ári paıdalaný jáne satý boıynsha jumysty uıymdastyrýdy jergilikti atqarýshy organ júzege asyrady. Alaıda azamattyq zańnamany buza otyryp, azamat A.-ǵa qubyrlardy buzýǵa jáne olardy áketýge ruqsat berilgen», – dedi departamentten.
Sondaı-aq tekserý barysynda azamat A. Memlekettik kirister departamentiniń (MKD) aqparattyq júıeler derekqorynda kásipker retinde tirkelmegeni anyqtaldy. Osyǵan baılanysty zańsyz kásipkerlikpen aınalysqan oǵan qatysty aqparat MKD-ǵa jiberilgen.
Departament aýyldyq okrýg ákiminiń tártiptik jaýapkershiligi Ádep jónindegi keńestiń kezekti otyrysynda qaralatynyn atap ótti.
