Pavlodar oblysynda aqbókender sany 8 myńnan asty
PAVLODAR. QazAqparat – Pavlodar oblysynyń aýmaǵynda «Aqbóken» aýqymdy tabıǵatty qorǵaý aktsııasy ótkizilýde, dep habarlaıdy QazAqparat Ravlodarnews.kz saıtyna silteme jasap.
Atalmysh sharanyń negizgi maqsaty - brakonerlikpen kúresti kúsheıtý, sondaı-aq tabıǵatty qorǵaý zańnamasyn buzýdyń jolyn kesý.
- Jeltoqsan aıynda erkek kıikter edáýir álsireıdi, sondyqtan olar brakonerler men jyrtqyshtar úshin ońaı oljaǵa aınalady. Kıikterdiń jappaı qyrylý ýaqyty mamyr aıynda, ıaǵnı tóldeý kezinde bolady. «Aqbóken» aktsııasyn ótkizý kezeńinde kıikterdiń múıiziniń zańsyz aınalymyna qarsy kúres kúsheıtilip, olardy elden tys jerlerge áketýge tosqaýyl qoıylady. Ol úshin aýmaqtyq polıtsııa organdarynyń ókilderi men «Ohotzooprom» ÓB» RMQK ınspektorlary qatarynan mobıldi toptar quryldy, - dedi onlaın formatta ótken brıfıng barysynda «Ohotzooprom» ÓB» RMQK janýarlar dúnıesin qorǵaý qyzmetiniń basshysy Erjan Isabekov.
PD bastyǵynyń birinshi orynbasary polıtsııa polkovnıgi Jasqaırat Qaıyrovtyń aıtýynsha, aktsııa «Brakoner» jedel aldyn alý is-sharasy aıasynda ótýde.
- Jyl basynan beri polıtsııa qyzmetkerleri tabıǵatty qorǵaý zańnamasyndaǵy 760 quqyq buzýshylyqty anyqtady, onyń ishinde: 324 adam balyq aýlaý erejesin jáne 365 adam ań aýlaý erejesin buzǵan. Jalpy somasy 5,2 mln teńgeden astam ákimshilik aıyppul salyndy, - deıdi Jasqaırat Qaıyrov.
Aıta keterligi, búgingi tańda Pavlodar oblysynda 8000-nan astam aqbóken bar. Olar kóbinese Maı jáne Baıanaýyl aýdandarynda kezdesedi. Qyzyl kitapqa engen janýarlardy qorǵaý jáne saqtaý jumystary polıtsııa departamenti basshylyǵynyń erekshe baqylaýynda.
