Pavlodar oblysynda AITV dertine shaldyqqandardyń sany 3000-ǵa taıaǵan
NUR-SULTAN. QazAqparat - Pavlodar oblysy AITV juqpasynyń taralýy boıynsha elimizde birinshi orynda tur, dep habarlaıdy pavlodarnews.kz. Bul týraly óńirlik kommýnıkatsııalar qyzmetinde ótken baspasóz konferentsııasynda oblystyq AITV-ge qarsy kúresý jáne onyń aldyn alý ortalyǵy basshysynyń orynbasary Baqyt Janahmetova málim etti.
- 2018 jyly esirtki tutynýshylardyń arasynda júrgizilgen zertteý nátıjesinde úlken kólemdi shprıtsterge suranys joǵary ekeni anyqtaldy, - deıdi Baqyt Janahmetova. - Sebebi, jańa sıntetıkalyq esirtkiler paıda boldy. Olar áleýmettik jeliler arqyly taralady. Sıntetıkalyq esirtkilerge táýeldilik ekinshi dozadan keıin paıda bolady ári ólimge tez ákeledi, buryn deni saý bolǵan adam aqylynan aıyrylady. Úlken kólemdi shprıtsterdi birden on adam tutynady. Oblysta esirtki tutynýshylardyń 60 paıyzy shprıtstermen qamtamasyz etiledi. Ótken jyly dárilik preparattardy satyp alý úshin 440 mıllıon teńge jumsalyp, 1680 adam emdelgen.
Spıkerdiń aıtýynsha, 2019 jyldyń naýryz aıynyń sońynda óńirde AITV juqpasyna shaldyqqan 2957 adam anyqtalǵan. Ýaqyt óte kele, keıbireýi shamadan tys esirtki tutyný, kólik apaty, basqa da sebepterden qaza tabady. Degenmen, onyń ishinde tórtinshi satyda AITV juqpasy saldarynan oryn alǵan ólim ǵana tizimge alynady. Qazirgi tańda olardyń sany 446 adamdy qurap otyr.
- SPID - AITV juqpasynyń eń sońǵy satysy, - deıdi Baqyt Janahmetova. - Bizdiń aımaqta dertti anyqtaý jaqsy jolǵa qoıylǵan. Aldyn alý sharalary tolyq kólemde júrgiziledi. 2018 jyldan bastap testileýden ótkizý jáne emdeý strategııasy boıynsha antıretrovırýsty em júrgiziledi. Ótken jyldyń qorytyndysy boıynsha SPID ortalyǵynda dıspanserde turǵandardyń 80 paıyzy emdelgen. Bul josparly kórsetkish. Dárigerlerdiń keńesine qulaq túrse, vırýstar sanyn mınımýmǵa deıin azaıtýǵa bolady.
Ortalyq usynǵan málimetke súıensek, 2017 jyldan keıbir preparattar farmatsevtıkalyq kompanııalar usynǵan baǵadan 20 esege arzan ıÝNISEF arqyly satyp alynady. Óńir turǵyndarynyń 14 paıyzy jyl saıyn AITV juqpasyna testileýden ótedi. 2015 jyldan beri aýrýdyń jynystyq jolmen taralý kórsetkishi basym bolsa, keıin ishki tamyrǵa esirtki salý arqyly 60 paıyzy artqan.
- 2001-2002 jyldary Pavlodar oblysy arqyly geroın tranzıti ótkende bir bóligi bizdiń oblysta qalyp qoıyp otyrǵany belgili. Sol kezde 19-20 jastaǵy jastar arasynda táýeldilik kóp bolǵan, - deıdi Baqyt Janahmetova.
