Pavlodar oblysynda adam qaǵyp óltirip, qashyp ketken júrgizýshi ustaldy
PAVLODAR. QazAqparat - Pavlodarda jaıaý júrginshini qaǵyp, oqıǵa ornyna qashyp ketken júrgizýshi ustaldy, dep habarlaıdy QazAqparat.
Bul jaıynda Pavlodar oblystyq polıtsııa departamentiniń baspasóz qyzmeti málimet taratty.
28 naýryz kúni keshki 20.35 kezinde Omby-Maıqapshaǵaı tasjolynyń Pavlodar qalasyna bara jatqan tusynda beımálim kólik 28 jastaǵy jaıaý júrginshini qaǵyp ketken.
Ol toqtap, jábirlenýshige kómektespeı, oqıǵa ornynan izin sýytqan. Al jaıaý adam alǵan jaraqatynan aýrýhanada kóz jumdy.
«Atalǵan fakti negizinde QK 345-baby boıynsha sotqa deıingi tergeý bastaldy« deıdi Pavlodar oblystyq polıtsııa departamenti bastyǵynyń orynbasary Jasqaırat Qaıyrov.
Polıtsııa kúdiktini izdep, tabý úshin orasan zor jumys atqardy. Olar oqıǵa ornynan kóliktiń usaq bólshekterin taýyp, mashınanyń markasyn anyqtaýǵa tyrysty.
«Jol boıyndaǵy kafelerdegi, janarmaı stansasyndaǵy vıdeokameralardy qarap, kúdikti kóliktiń izine túsýge tyrystyq. Tártip saqshylary sol kúni atalǵan tasjolmen júrip ótken 300-den astam kólikti tekserip, júrgizýshilerden jaýap alyp shyqty. Bir kóliktiń vıdeotirkegishindegi jazbanyń kómegimen adam qaqqan kóliktiń markasy men nómirin anyqtaý múmkin boldy. Sol arqyly búkil polıtsııa bólimshelerine baǵyttama joldandy» deıdi Jasqaırat Qaıyrov.
Muqııat ári tııanaqty jumystyń nátıjesinde pavlodarlyq polıtseıler akademık Shoqın kóshesindegi bir aýladan kúdikti kólikti tapty.
Avtomashına aıyp turaǵyn qoıyldy. Kúdikti ustalǵan, tıisti tergeý jumystary júrip jatyr.
