Pavlodar oblysynda 99-meshit ashyldy
Meshittiń ashylý saltanaty Máshhúr Júsip ortylyq meshitiniń ımamy Dáýlet Rústemovtyń Quran oqýymen bastaldy. Odan keıin aıtysker aqyn Abzal Qabdrash jańa Allanyń úıine arnaý jyryn aıtty. Qazaqstan musylmandary Dinı basqarmasynan arnaıy kelgen Saǵıthan qajy Dáýledııar pavlodarlyqtarǵa Bas Múftı Erjan qajy Malǵajyulynyń sálemin jetkizip, jańa meshittiń ashylýymen quttyqtady.
Al QMDB-nyń Pavlodar oblysy boıynsha ókili, Máshhúr Júsip ortalyq meshitiniń bas Imamy Narıman Isenov óz kezeginde osy meshittiń boı kóterýine qoldaý bildirgen qala ákimi Nurjan Áshimbetovke alǵysyn bildirdi.
Sondaı-aq, Alla úıine demeýshilik jasaǵan jergilikti kásipkerler Berik jáne Serik Omarhandarǵa rızashylyǵyn bildirip, úlken Quran kitap syılady.
«Qasıetti jumada ashylǵan Allanyń úıi záýlim meshitimiz qutty bolsyn. Bul ómirge kelgen árbir adam osyndaı saýapty is jasaýdy armandaıdy. Adam balasy tirisinde osyndaı záýlim peshit salsa, ana dúnıege barǵanda Alla oǵan záýlim saraı salyp beredi eken. Sondyqtan osyndaı saýapty is jasaǵan baýyrlarymyzǵa barsha jamaǵat atynan alǵys aıtamyn. Jańa qulshylyq úıiniń ataýy áıgili tórt halıfanyń biri, Omar hazrettiń qurmetine «Omar ál-Farýh» dep atalǵan», - dedi Narıman ımam.
Alla úıiniń qurylys sáýleti ulttyq naqyshpen turǵyzylǵan. Meshittiń úlken namazhana zaly, kitaphanasy, eki dárishanasy, bir úlken áıelder zaly, neke jáne ımamdar bólmesi bar. Sonymen qatar, jamaǵattarǵa arnalǵan 150 oryndyq avtoturaq bólingen jáne meshit aýlasyna ashana salý qarastyrylǵan. Aıta keteıik, jańa meshittiń bas ımamy bolyp QMDB buıryǵymen Hasan Amanqulov bekitildi. Ashylý saltanatynan keıin jınalǵandarǵa ýaǵyz aıtyp, alǵashqy juma namazyn ótkizdi.
