Pavlodar oblysynda 8 jasar bala balkonda qamalyp qaldy
PAVLODAR. QazAqparat – Pavlodar oblysynda biri balkonda, biri páterde qamalyp qalǵan eki bala qutqaryldy, dep habarlaıdy QazAqparat pavlodarnews.kz saıtyna silteme jasap.
Tótenshe jaǵdaılar departamentiniń málimetine sáıkes, Aqsý qalasyndaǵy úıdiń tórtinshi qabatynda 8 jasar bala balkonda qamalyp qalǵan.
«Keshe, saǵat 13.35-te kezekshilik bólimge esiktiń jabylyp qalǵany týraly habarlama tústi. Bala balkonǵa shyǵyp, dalada ne bolyp jatqanyn kórgisi kelgen. Alaıda esik jabylyp qalǵan. Sol sátte úıge kire almaǵan anasy «101» nómirine qońyraý shalǵan», - dedi departamentten.
Órt sóndirýshiler avtosaty arqyly balkonǵa kóterilip, esikti ashqan.
Sondaı-aq saǵat 14.50-te dúkenge shyǵyp ketken áıel úıge qaıtyp kelgende esikti asha almaı qalǵanyn aıtyp, habarlasqan. Páterde alty jastaǵy bala jalǵyz qalǵan.
«Dónentaev kóshesi, 32-úıge kómekke ýchaskelik ınspektor men jedel qutqarý jasaǵynan eki adam, bir tehnıka jumyldyrylyp, arnaıy qural arqyly esikti ashty», - delingen habarlamada.
