Pavlodar oblysynda 8 synyp oqýshysy «Aqyldy jylyjaı» oılap tapty
PAVLODAR. QazAqparat - Pavlodar qalasynda ótken oblystyq «Uly ónertabysqa birinshi qadam» atty tehnıkalyq jobalardy qurastyrý baıqaýynda «Aqyldy jylyjaı» jasap shyǵarǵan Roman Pıatak 1-oryn ıegeri atandy, dep habarlaıdy pavlodarnews.kz.
Ertis aýdany №4 mektebiniń 8-synyp oqýshysy «Aqyldy jylyjaıdyń» avtomatty túrde sýarylyp, jaryqtandyrylyp, jylynatynyn atap ótti.
«Joba arqyly jylyjaıǵa jumsalatyn adam kúshin azaıtýǵa bolady, - dedi Roman Pıatak.
Onyń sózinshe, jylyjaıdy toq kózine qossa bolǵany. Jumysty ózi atqarady. Ósimdikti kúndiz sýarýǵa bolmaıdy. Ol zııan. Sondyqtyn «FB 2M» fotoblok qurylǵysy arqyly qarańǵy túsken sátte avtomatty túrde jaryq qosylady. Al, jaryqpen birge tamshylap sýarý qubyrlary jumysyn bastaıdy. Alaıda, jaryq tań atqansha janyp turǵanymen, arnaıy ýaqyt eseptegish qurylǵysy arqyly sýarý toqtatylady.
«Meniń jobamda sýarý 10 sekýndqa jalǵasady. Sonymen qatar, jylyjaı ishinde turaqty temperatýra saqtalady. Baqylaý qurylǵysy arqyly temperatýra túse bastaǵan sátte jylytqysh qosylyp, aýany qalypqa keltiredi»,-deıdi ónertapqysh
Ol kóktemde «Aqyldy jylyjaıda» shalǵam ósip shyqqanyn aıtady.
«Jylyjaıdy qurastyrýdy bir jyl buryn bastaǵan bolatynmyn, Tolyq aıaqtaýǵa eki aı ýaqyt jumsaldy. Jyldyń basynda ózge respýblıkalyq baıqaýda 1-orynǵa ıe boldym. Kóktemde synaq retinde jasaǵan jumysymyzda shalǵam ósip shyqty» - dedi Roman Pıatak.
Aıta keteıik, jobany jasaýda oqýshy eshqandaı zat satyp almaǵan. Barlyǵyn aýyldaǵy qaldyq zattarmen qurastyrǵan. Oblystyq «Uly ónertabysqa birinshi qadam» atty tehnıkalyq jobalardy qurastyrý baıqaýynda «aýyl sharýashylyǵy tehnıkalaryn jasaý» baǵyty boıynsha jeńimpaz atanǵan oqýshy endi respýblıkalyq kezeńde baq synaıdy.
