Pavlodar oblysynda 8 myńǵa jýyq kóliktiń benzınnen gazǵa aýysýyna ruqsat berilgen
PAVLODAR. QazAqparat – Pavlodar oblysynda 8 myńǵa jýyq kólik gazben júrýge ruqsat aldy, dep habarlaıdy QazAqparat.
«Oblysta gaz jabdyǵyn ornatýmen aınalysatyn 10 fırma ǵana bar. Ony ornatar aldynda kólik ıesi áýeli bizden ruqsat alady, sodan keıin ózine qolaıly fırmany taýyp, zerthanalyq tekseristen ótedi. Sosyn ǵana hattama men qaıta jabdyqtaý jónindegi kýálik qolyna tıedi. Barlyq qujattardy jınaǵan soń júrgizýshi kóligin mamandandyrylǵan HQO-ǵa aparyp tirkeýge qoıady», - dep túsindirdi Pavlodar oblystyq polıtsııa departamenti ákimshilik polıtsııa basqarmasynyń aǵa ınspektory Baýyrjan Maqashev.
Pavlodar oblysy ákimi baspasóz qyzmetiniń málimetinshe, óńirde 8 myńǵa jýyq kóliktiń gaz jabdyǵyn ornatýyna ruqsat berilgen. Kóligin qaıta jabdyqtaǵan júrgizýshiler avtomobıline «GAZ» degen arnaıy belgini japsyryp alýy tıis. 2020 jyldan bastap osyndaı belgi japsyrý durys ekenin QR ІІM tótenshe jaǵdaılar komıteti basshysynyń orynbasary Barat Duzaqbaev aıtqan bolatyn. Ol eń aldymen aınaladaǵylardyń qaýipsizdigin qamtamasyz etý úshin qajet. Suıytylǵan gaz qoldanatyn kólikterdi parkıng pen jerasty avtoturaqtaryna qoıýǵa ótken jyldan beri tyıym salynǵan.
«Kólikti qaıta jabdyqtaýdy jol polıtsııasy avtomobıldiń qaýipsizdik talaptaryna sáıkestigin jáne tehnıkalyq jaǵdaıynyń oıdaǵydaı ekenin rastaıtyn uıymdarmen kelisedi. Bul protsedýrany mamandandyrylǵan akkredıttelgen zerthana júrgizedi. Tehnıkalyq saraptama hattamasyn beretin de sol zerthana», - dep málim etti ákimdikten.
Polıtsııa departamentiniń aqparatynsha, qaıta jabdyqtaý týraly kýáliktiń qorǵanys belgisi bar, sondyqtan ony qoldan jasaý múmkin emes.
