Pavlodar oblysynda 7 turǵyn vaktsına pasportyn satyp alǵanyn moıyndady

PAVLODAR. QazAqparat – Jalǵan ekpe tólqujaty bar bul azamattar óz emhanasyna ótinish jazyp, COVID-19 vırýsyna qarsy vaktsınany is júzinde saldyrta alady, dep habarlaıdy QazAqparat.

«Oblystyń jeti turǵyny emhanalarǵa baryp, jalǵan ekpe pasporty bar ekenin habarlady. Mundaı ótinishter Sharbaqty aýdandyq aýrýhanasyna, temirjol aýrýhanasyna, Pavlodar qalasynyń №4 emhanasyna, «Danel» jáne Aqsý qalalyq aýrýhanasyna kelip túsken», - dep habarlady Pavlodar oblystyq densaýlyq saqtaý basqarmasynan.

Ótinish jazǵandar arasynda óz densaýlyǵyna alańdap, ekpe saldyrtýdy sheshkender bolǵan.

Sebebi satyp alynǵan pasport olardy koronavırýs ınfektsııasynan qorǵaı almaıdy.

«Keıbireýleriniń vaktsınatsııa datasy sáıkes kelmegen: qaǵazda adamnyń ekpeni emhanada alǵany jazylsa, is júznde ol sol ýaqytta jumysta bolǵan. Ótinish jazyp kelgenderdiń kóbi pasportty eldiń basqa oblystarynda satyp alǵanyn aıtyp berdi», - dep atap ótti oblystyq basqarmadan.

Jalǵan ekpe tólqujatyn jasatqan Ertis mańy turǵyndary áli de óz emhanasyna kelip, ótinish jaza alady.

«Sol arqyly olar COVID-19 vırýsyna qarsy naqty vaktsınatsııadan óte alady» dep naqtylady vedomstvodan.