Pavlodar oblysynda «7-20-25» baǵdarlamasy iske aspaı tur - Asqar Mamın
ASTANA. QazAqparat - Pavlodar oblysynda «7-20-25» baǵdarlamasy iske aspaı tur. Bul týraly búgin «Nurly jer» baǵdarlamasynyń iske asyrylýy qaralǵan Úkimet otyrysynda Premer-Mınıstr Asqar Mamın aıtty, dep habarlaıdy QazAqparat tilshisi.
«Bolat Jumabekuly, oblysta aǵymdaǵy jyldyń eki aıynda turǵyn úıge salynatyn ınvestıtsııa ótken jyldyń osyndaı kezeńimen salystyrǵanda 30 paıyzǵa tómendegen. Sondaı-aq, turǵyn úılerdi paıdalanýǵa berý kórsetkishi tómendep, ótken jylmen salystyrǵanda 50 paıyzǵa azaıyp otyr», - dedi otyrys barysynda Úkimet basshysy Pavlodar oblysynyń ákimi Baqaýovqa qarata.
Óz kezeginde Pavlodar oblysynyń ákimi ótken eki aıda shynymen de qurylys salasyndaǵy kórsetkishter oryndalmaǵanyn moıyndady.
«Toqsan qorytyndysynda oń dınamıkany qamtamasyz etemiz. Ósim 110 paıyzdy quraıdy. Bir merdigerler «Saryarqa» shaǵyn aýdanynda 10 myń páterdi úlgermedi», - dedi oblys basshysy.
Osy oraıda Premer-Mınıstr Pavlodar oblysynyń ekonomıkalyq jáne óndiristik áleýeti óte joǵary ekenin atap ótti.
«Ortasha eńbekaqy joǵary deńgeıde jáne Turǵyn úı qurylys jınaq bankiniń salymshylary óte kóp. Biraq, óńirde «7-20-25» baǵdarlamasy iske aspaı tur. Respýblıka boıynsha jalpy 6 myń ótinish maquldansa, sizderde ol nebári 77 ǵana, ıaǵnı bir paıyz», - dedi Asqar Mamın.
Bolat Baqaýov qazirgi ýaqytta «7-20-25» baǵdarlamasy boıynsha ekinshi deńgeıli bankter 181 ótinim qabyldaǵanyn aıtty.
«Sonyń ishinde búgingi kúni 80 ótinim maquldandy. Qazirgi ýaqytta osy baǵdarlama arqyly iske asyrýǵa oblysta 283 páter bar. Buǵan qosa, ENRC kompanııalar toby óz qyzmetkerlerine 2019 jyly 350 páterdi osy baǵdarlama boıynsha satyp alý kelisimin jasady. Birinshi jartyjyldyqtan keıin osy kórsetkishterdi durystaımyz», - dep ýáde berdi Pavlodar oblysynyń ákimi.
