Pavlodar oblysynda 6000-nan astam mádenıet salasy qyzmetkeriniń jalaqysy ósedi
NUR-SULTAN. QazAqparat - Qazaqstandyq salalyq kásiptik odaq Pavlodar oblystyq fılıalynyń tóraıymy Alma Qozybaeva Memleket basshysynyń Qazaqstan halqyna Joldaýy jaıynda óz oıymen bólisti, dep habarlaıdy pavlodarnews.kz.
«Prezıdent óz Joldaýynda bizdiń halqymyzdyń áleýmettik jaǵdaıyna jáne ómir súrý sapasyna erekshe nazar aýdaryp otyr, - dedi Alma Qozybaeva. - Ol halyqqa arnaǵan úndeýinde mádenıet salasyna jetkilikti kóńil bólinbeı otyrǵandyǵyn basa aıtty. Bul jaı mádenıet salasy qyzmetkerleriniń tómen jalaqysynan baıqalady. Sondaı-aq Qasym-Jomart Kemeluly mádenıet salasynyń jas qyzmetkerleri turǵyn úımen qamtamasyz etý boıynsha jeńildikpen beriletin baǵdarlamalarǵa qatysa almaı otyrǵandyǵyna nazar aýdardy. Búgingi kúni bizdiń kitaphanashylarymyz, teatrlardyń ártisteri, mýzeılerdiń qyzmetkerleri jáne taǵy basqalarynyń eńbekaqysy tómen ekendigi barshaǵa málim».
Fılıal tóraıymy mádenıet, sport, týrızm jáne aqparat salasy qyzmetkerleri kásipodaǵy qozǵalysynyń kóshbasshysy retinde búgingi Joldaýdyń orny erekshe ekenin atap ótti.
«Pavlodar oblysynyń 6000-nan astam mádenıet salasy qyzmetkeriniń jalaqysy artady. Sonymen qatar, turǵyn úı jaǵdaılaryn jaqsartýǵa múmkindikteri bolatyndyǵyn seziný – úlken qýanysh», - dedi Alma Qozybaeva.
