Pavlodar oblysynda 57 eldi meken erekshe baqylaýǵa alyndy
PAVLODAR. QazAqparat - Pavlodar oblysynda sý tasqyny kezinde 57 eldi meken, 42 avtomobıl jáne bir temirjol ýchaskesi erekshe baqylaýǵa alynǵan.
Bul týraly óńirlik kommýnıkatsııalar qyzmetinde ótken baspasóz jıynynda oblystyq TJD bastyǵynyń orynbasary Samat Asaıynov aıtty, dep habarlaıdy pavlodarnews.kz.
«Byltyr qar jamylǵysynyń qalyńdyǵy jarty metrge deıin barǵan», - deıdi Samat Asaıynov. - Búgingi tańda «Qazgıdromet» RMK usynǵan málimetke súıensek, qar jamylǵysy ortasha statıstıkalyq normadan 10 paıyzǵa jáne byltyrǵy jylmen salystyrǵanda 30 paıyzǵa tómen. Qalalar men aýdandarda sý tasqynyna qarsy sharalar júrgizilip, 407 myń tekshe metr qar shyǵaryldy. Bul kórsetkish ótken jylmen salystyrǵanda úsh esege kem».
Spıkerdiń aıtýynsha, Baıanaýyl aýdanynda jaǵdaı turaqty. Oblystyq tabıǵatty qorǵaý prokýratýrasynyń ókilderimen birge tótenshelikter Qaraǵandy oblysynyń Qaratoqa jáne Aqjar bógetteri ornalasqan Buhar jyraý aýdanyn tekserip shyqqan. Ol jaqtaǵy sýótkizgish qubyrlar qardan tazartylǵan. 227 tonna janar-jaǵarmaı, 20 myń tonna ınertti materıal, 52 myń ydysqap daıyndalǵan. Sý tasqyny kezinde jeke quramnan 600 tehnıka men 61 júzý quraly, 1827 adam daıyndalǵan. Avtomobıl joldaryn qardyń sýy shaıyp ketýdiń aldyn alý jáne úzdiksiz jol qozǵalysyn qamtamasyz etý maqsatynda jol qyzmetimen 1 myń 310 sýótkizgish qubyr tazartylady. Búgingi tańda 724 qubyr qardan arshylǵan. - Ázirge eshbir qaýip tónip turǵan joq, - deıdi Samat Asaıynov. - Alaıda aýa temperatýrasynyń joǵarylaýyna baılanysty erigen qar sýy basýy múmkin. Marshrýttar belgilengen. Tótenshe jaǵdaı oryn alǵan jaǵdaıda turǵyndarǵa eskertiledi. Sınoptıkterdiń boljamynsha, úshinshi on kúndikte ortasha eseppen alǵanda synap baǵanasy túnde -5 ten -15, kúndiz - 1, -5 gradýsty quraıdy. Sondyqtan bıyl qaýipsiz ótedi degen úmittemiz».
