Pavlodar oblysynda 56 jastaǵy turǵyn órtten kóz jumdy
PAVLODAR. QazAqparat – Pavlodar oblysynda eki úlken órt sóndirildi, dep habarlaıdy QazAqparat.
«Pavlodar oblystyq tótenshe jaǵdaılar departamentiniń órt sóndirý qyzmeti №13 órt sóndirý beketiniń qyzmetkerleri Aqsý qalasynyń aýyldyq aımaǵyna kiretin Aqjol aýylyndaǵy órt kezinde benzın quıylǵan bes kanıstr men eki ballondy qaýipsiz jerge shyǵardy. 101 pýltine órt týraly habarlama saǵat 09:50-de kelip túsken», - dep málimdedi tilshilerge Pavlodar oblystyq TJD baspasóz qyzmetinen.
«Ábdirov kóshesindegi jekemenshik turǵyn úıdiń kirpish garajynda esiktiń aǵash qaptaýy men aǵash sóreler órtengen. Jalyn 12 sharshy metr aýmaqty sharpyǵan», - dep atap ótti baspasóz qyzmetinen.
«Órt sóndirýshiler ishine benzın quıylǵan syıymdylyǵy 20 lıtr eki kanıstrdi jáne benzın quıylǵan úsh plastık kanıstrdi syrtqa shyǵardy. Sondaı-aq órt sóndirýshiler syıymdylyǵy 50 lıtr ottegi ballonyn jáne 27 lıtrlik bir gaz ballondy qaýipsiz jerge shyǵardy. Gaz ben tútinnen qorǵaý qyzmeti tobynyń jedel áreketteriniń arqasynda gaz ballondardyń jarylýy men kanıstrlerdegi janarmaıdyń órtenýine jol berilgen joq», - dep atap ótti aımaqtyú vedomstvonyń baspasóz qyzmetinen.
Jalyn saǵat 10:10-da aýyzdyqtalyp, saǵat 10:38-de tolyq sóndirildi. Órttiń sebebi men odan keltirilgen shyǵyn kólemi anyqtalýda.
«Taǵy bir órt Pavlodarskoe aýylynda bolǵan. Onyń saldarynan 1964 jylǵy er adam qaza tapty. Dıspetcherlik qyzmetke órt týraly habarlama saǵat 21:13-te kelip túsken. Órt kezinde ekibólmeli turǵyn úı tolyq órtenip, shatyry jarym-jartylaı opyrylyp túsken. Jalyn 50 sharshy metr aýmaqty sharpyǵan», - dep belgilep ótti TJD-dan.
Kórshiler órtke oranǵan úıden onyń ıesiniń kúıik shalǵan denesin alyp shyqty. Olar er adamnyń spırttik ishimdikterdi kóp ishkenin qosyp ótti.
Oqıǵa ornyna kelgen 103 qyzmetiniń dárigerleri onyń ólimin tirkedi. №1 mamandandyrylǵan órt sóndirý qyzmetkerleri jalyndy saǵat 21:47-de aýyzdyqtap, 21:54-de tolyq sóndirdi.
Tótenshe oqıǵa ornynda úsh kólikpen kelgen oblystyq TJD órt sóndirý qyzmetiniń toǵyz qyzmetkeri jumys istedi.
«Qazirgi kezde oqıǵa ornynda synaq-órt sóndirý zerthanasynyń qyzmetkerleri jumys isteýde, olar órttiń shyǵý sebebi men kelgen shyǵyn kólemin anyqtaıdy», - dep málimdedi departamentten.
