Pavlodar oblysynda 520 shaqyrym jol jóndeledi

Bıylǵy jyly óńirde joldardy kútip ustaýǵa oblystyq jáne respýblıkalyq bıýdjetten shamamen 12,4 mıllıard teńge qarastyrylǵan. Bul qarjyǵa ortasha eseppen alǵanda 520  shaqyrym joldy jóndep, kúrdeli jóńdeý josparlanǵan.  

Kóriktendirý naýqanyn ýaqytyly jáne tıimdi ótkizý boıynsha iri merdigerlik uıymdar 420-dan astam tehnıka iske qospaq. Qazirgi kúni jóndeý jumystaryn júrgizetin adamdar shyǵys materıaldaryn daıyndaýda. Oblys ákimdiginde ótken keńeıtilgen otyrys kezinde bıtým daıyndaýǵa basa nazar aýdaryldy. Bul ónimniń jetispeýshiligi aldyńǵy jyldary jol qurylysyna áserin tıgizgen bolatyn.

«Jyl basynda avtomobıl joldary komıtetine  jolǵa qansha bıtým qajet ekeni týraly aıtqan  edik. Naýryz aıynda Energetıka mınıstrligi, «PMHZ» JShS jáne merdigerlik uıymdardyń ókilderimen birge jıyn ótkizilgen. Budan keıin  mınıstrlik  2018 jylǵa bıtým óndirý kóleminiń kestesin qurǵan. Osyǵan sáıkes bizdiń merdigerler qajet bıtýmdy «PMHZ» JShS-nan satyp alady, - dedi jolaýshylar kóligi jáne avtomobıl joldary basqarmasynyń basshysy Ermurat Nurhanov.

 Munaı óńdeý kásiporynyń  ókilderi búginde 22 myń tonna bıtým tıelgenin habarlady. Onyń 15 myń tonnasy Pavlodar oblysynda qalǵan. Sáýir aıynda zaýytta shamamen 41 myń tonna  bıtým shyǵarylady.

«Bıtým daıyndaý máselesi kúndelikti baqylaýda bolýy tıis. Jaz mezgilinde jabdyqtaýshy óz ónimine baǵany kóterýi múmkin. Álbette, suranysqa baılanysty usynys ta artady. Budan keıin qurylysshylar qarjy jetpeıtindigine, bıtýmǵa uzyn-sonar kezek turatyndyǵyna shaǵymdanady. Biz aldyn ala tólem jasap qoıǵan joqpyz ba? Kúz kezinde merdigerler materıaldar daıyndasyn dep aıtqan edik» - dep talap etti óńir basshysy Bolat Baqaýov.    

Budan basqa, oblys ákimi basshylarǵa kelesi jylǵa joldardyń qurylysy men jóndeý jumystaryna jobalyq-smetalyq qujattama daıyndaý qajettigin eske saldy.

Oblys ákimi jobalardy 15 mamyrǵa deıin tapsyrýdy júktedi.