Pavlodar oblysynda 50-ge jýyq kólik qar qursaýynda qaldy
PAVLODAR. QazAqparat – Ázirge 15 júk kóligi tasjolda qaldy, qutqarýshylar men jol qyzmetkerleri joldy qardan tazalaý jumystaryn jalǵastyrýda, dep habarlaıdy QazAqparat tilshisi.
«14 qańtar kúni saǵat 15:00-den 15 qańtar 06:00-ge deıin Qaraǵandy oblysyna baǵyttalǵan aınalma jolda Bozshakól aýylynan 15 shaqyrym jerde jaıaý burqasyn saldarynan TJD kúshimen joldy qardan tazalaý jáne kólik qozǵalysyn úılestirý boıynsha jumystar júrgizildi. Barlyǵy tazalanǵan ýchaskege 36 tehnıka shyǵaryldy, onyń ishinde 25 júk kóligi, bir avtobýs jáne on jeńil avtokólik, 100-ge jýyq adam bar», - dep habarlady Pavlodar oblysynyń tótenshe jaǵdaılar departamenti.
Júrgizýshiler men jolaýshylar qaýipsiz jerge shyǵaryldy, olarǵa medıtsınalyq kómek qajet bolmady. Zardap shekkender joq.
«Saǵat 06.00-degi jaǵdaı boıynsha 15 júk kóligi qar qursaýynda qalyp otyr. Qar tazalaý jumystary TJD (úsh qyzmetker jáne bir tehnıka), «Qazaqavtojol» JShS (úsh qyzmetker jáne úsh tehnıka) kúshimen jalǵasýda. Adamdardy evakýatsııalaý úshin Shıqyldaq aýylynda (mektep bazasynda, syıymdylyǵy - 60 adam) jáne Bozshakól stansasynda (mektep bazasynda, syıymdylyǵy - 60 adam) eki jylytý pýnkti ashyldy»,- dep atap ótti qutqarýshylar.
Vedomstvonyń málimetinshe, ótken táýlikte qolaısyz aýa raıynan (boran, burqasyn, jol kórinisiniń nasharlaýy) aımaqta respýblıkalyq jáne oblystyq mańyzy bar avtomobıl joldarynda apattyq-qutqarý jumystary júrgizildi.
