Pavlodar oblysynda 5 bala órtten zardap shekti

AQSÝ. QazAqparat – Pavlodar oblysynda kópqabatty úıdegi órtten 5 bala zardap shekti, dep habarlaıdy QazAqparat Pavlodarnews.kz saıtyna silteme jasap.

Pavlodar oblysy Tótenshe jaǵdaılar departamentiniń baspasóz qyzmetinen málim etkendeı, oqıǵa 9 aqpan kúni bolǵan. Saǵat 17:55-te 101 nómirine Aqsý qalasy, Astana kóshesinde ornalasqan úılerdiń birinde órt shyqqany jaıynda habarlama túsken.

Órt ornyna jetken qutqarýshylar 5 qabatty turǵyn úıdiń 1-qabatyndaǵy 2 bólmeli páterdiń jatyn bólmesinde jeke zattar men jıhaz janyp jatqanyn anyqtady. Jalyn 12 sharshy metr jerdi sharpyǵan.

«Oqıǵa ornynan 7 adam evakýatsııalandy. Jedel járdem brıgadasy Aqsý qalasyndaǵy ortalyq aýrýhanaǵa 3 eresek jáne 6 balany jetkizdi. Keıin 5 bala ortasha ýlanýmen aýrýhanaǵa jatqyzyldy»,- delingen habarlamada.

Tilsiz jaýdyń taralýy saǵat 18:20 toqtatylyp, saǵat 18:44-te tolyqtaı sóndirildi. Jalyndy aýyzdyqtaýǵa Pavlodar oblysy TJD-niń 8 tehnıkasy men 16 qyzmetkeri tartyldy.

Órttiń shyǵý sebebi anyqtalyp jatyr.