Pavlodar oblysynda 400 mas júrgizýshi jazalandy
PAVLODAR. QazAqparat – Pavlodar oblysynda polıtsııa mas kúıinde rólge otyrǵan 400 adamdy jazalady, sonymen qatar esirtki áserinde bolǵan júrgizýshilerdi jaýapqa tartty, dep habarlaıdy QazAqparat tilshisi.
«Toraıǵyrov-Sátpaev kósheleriniń qıylysynda tártip saqshylary «Nıssan» avtokóligin toqtatty, júrgizýshi mas bolǵan; medıtsınalyq kýálandyrý muny dáleldedi. Er adamǵa qatysty QR ÁQBtK-nyń 608-baby 1-tarmaǵy boıynsha ákimshilik hattama ázirlendi («Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý»). Pavlodar qalasy mamandandyrylǵan ákimshilik sotynyń sheshimimen quqyq buzýshyny on bes táýlikke ákimshilik qamaqqa alý jáne jeti jyl merzimge kólik quralyn basqarý quqyńynan aıyrý taǵaıyndaldy», - dep habarlady Pavlodar oblysy polıtsııa departamenti baspasóz qyzmetinen.
Pavlodar oblysy polıtsııa departamentiniń jergilikti polıtsııa qyzmeti basqarmasynyń basshysy Ǵalym Sarǵulov 2021 jyly kólik quralyn alkogoldik jáne esirtkilik masań kúıde basqarǵany úshin sol bap boıynsha 400 ákimshilik hattama jasalǵanyn aıtty.
«Mas júrgizýshilerdiń jıi adamdar jaraqat alatyn jáne qaza tabatyn aýyr apattarǵa kináli bolatynyna qaramastan, azamattar basty erejelerdi saqtamaıdy. Mas kúıde rólge otyrady. Sol sebepti Pavlodar oblysy polıtseıleri árdaıym joldaǵy jáne qoǵamdyq oryndardaǵy tártiptiń saqtalýyn qadaǵalap otyrady. Olardyń jumystarynyń arqasynda kúndelikti saldary jaman bolýy múmkin kóptegen quqyq buzýshylyq anyqtalýda», - dep qosty Pavlodar oblysynyń polıtsııa departamentinde.
