Pavlodar oblysynda 4 jasar balany kólik qaǵyp, mert qyldy
PAVLODAR. QazAqparat – Pavlodar oblysynda tórt jasar bala kólik dońǵalaǵynyń astyna túsip, ajal qushty, dep habarlaıdy QazAqparat Pavlodarnews.kz-ke silteme jasap.
Oblystyń Polıtsııa departamenti baspasóz qyzmetiniń málimetinshe, 28 maýsym kúni saǵat 17:30-da Aqsý aýyldyq aımaǵynyń Bereke aýylynda «VAZ 2106» markaly avtokóliginiń 21 jastaǵy júrgizýshisi jol boıyna júgirip shyqqan 2017 jyly týǵan qyzdy qaǵyp ketken.
«Jol-kólik oqıǵasy saldarynan búldirshin alǵan dene jaraqatynan oqıǵa ornynda kóz jumdy», - dedi Polıtsııa departamenti bastyǵynyń birinshi orynbasary Jasqaırat Qaıyrov.
Onyń aıtýynsha, júrgizýshige qatysty QR Qylmystyq kodeksiniń 345-baby 3-bóligi boıynsha sotqa deıingi tergeý bastaldy. Ol ýaqytsha ustaý ızolıatoryna qamaldy.
