Pavlodar oblysynda 4 myńnan astam aqtalmaǵan saıası qýǵyn-súrgin qurbandary anyqtaldy

PAVLODAR. QazAqparat - Saıası qýǵyn-súrgin qurbandaryn aqtaý máseleleri jónindegi óńirlik komıssııanyń jáne onyń jumys toptarynyń júrgizgen jumystarynyń esebi jarııalandy, dep habarlaıdy QazAqparat.

Óńirlik komıssııa quramynda jyl boıy 11 baǵyt boıynsha 6 jumys toby jumys istegen.

«Komıssııa ótken ǵasyrdyń 20-50 jyldaryndaǵy qýǵyn-súrgin qurbandaryn quqyqtyq jáne saıası aqtaý úshin arhıv materıaldaryn, tarıhı derekkózder men qujattardy zertteý boıynsha dáıekti jumys júrgizýde», - dedi Pavlodar oblystyq aqparat jáne qoǵamdyq damý basqarmasynan.

Basqarmanyń málimdeýinshe, jumys toptary júrgizgen zertteý nátıjesinde Pavlodar oblysynyń muraǵattarynda 449 qor, 2907 is, 4002 aqtalmaǵan azamat anyqtaldy.

«Aǵymdaǵy jyldyń qyrkúıek aıynda Pavlodar oblysy prokýratýrasyna qaraý úshin hat jáne 460 aqtalmaǵan saıası qýǵyn-súrgin qurbandarynyń tizimi jiberildi. Bul baǵyt boıynsha jumys jalǵasýda», - dedi basqarmadan.

Oblys boıynsha 51 jappaı jerleý oryndary anyqtaldy. Bilim berý basqarmasynyń «Aqparattyq tehnologııalar kolledjiniń» tehnıkalyq qoldaýymen Saıası qýǵyn-súrgin jáne ashtyq qurbandarynyń jerleý oryndarynyń ınteraktıvti kartasyn qurastyrý boıynsha jumys bastaldy.

Aıta keteıik, 2023 jyly ekinshi jumys tobynyń baǵyttary boıynsha saıası qýǵyn-súrgin qurbandary týraly derbes málimetterge basa nazar aýdara otyryp, muraǵattyq qujattar men materıaldar jınaǵyn shyǵarý josparlanýda.