Pavlodar oblysynda 4 myń bas mal aıyp turaǵyna qamaldy
PAVLODAR. QazAqparat - Pavlodar oblysynda qaraýsyz jaıylyp júrgen shamamen 4 myń bas mal aıyp turaǵyna qamaldy. Jalpy búginde óńirde mundaı 139 aıyp turaǵy jumys isteıdi, dep habarlaıdy QazAqparat.
«Adamdardyń óz múlkine salǵyrt qaraýy qaıǵyly jaıttarǵa alyp kelýi múmkin. Óıtkeni qaraýsyz jaıylyp júrgen mal ury-qaryǵa jem bolýymen qatar, jol-kólik oqıǵasyna da sebepker bolýy yqtımal», - deıdi óńirdiń jergilikti polıtsııa bastyǵy Ǵalym Sarǵulov.
Osy maqsatta pavlodarlyq polıtseıler oblys aýmaǵynda avtojoldar men jazdyq jaıylymdarǵa sholǵyndaý júrgizedi. Qaraýsyz jaıylyp júrgen maldy mamandandyrylǵan aıyp turaǵyna qamaıdy.
«Tek demalys kúnderi ǵana jazdyq jaıylymdarda qaraýsyz jaıylyp júrgen 753 bas mal aıyp turaǵyna qamaldy», - dedi jergilikti polıtsııa bastyǵy.
Polisia.kz portalynyń málimetinshe, polıtsııa qyzmetkerleri sholǵyndaý júrgizý barysynda Jelezın aýdanynyń Ozernoe aýylyna jaqyn mańda qaraýsyz jaıylyp júrgen 20 jylqyny anyqtaǵan. Bir úıir jylqy urylardyń qolyna túspeýi úshin aıyp turaǵyna aıdalǵan. Sál keıinirek jylqylardyń ıesi tabylyp, onymen túsindirý jumystary júrgizildi. Atalǵan fakti boıynsha veterınarııa organdaryna jylqylarda «ıdentıfıkatsııalyq nómirdiń» bolmaýyna baılanysty onyń ıesin jaýapkershilikke tartý úshin materıal jiberildi.
