Pavlodar oblysynda 3800-den astam otbasy jańa formatta áleýmettik kómek alýy múmkin
PAVLODAR. QazAqparat - Pavlodar oblysynda 3872 kóp balaly otbasy 2018 jyldyń 1 qańtarynan bastap elimizde engiziletin jańa formattaǵy ataýly áleýmettik kómek alý múmkindigine ıe.
Bul týraly oblys ákimdiginde ótken jıyn barysynda oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Qaırat Nurmaǵambetov aıtty, dep habarlaıdy pavlodarnews.kz .
«1 qarashadaǵy jaǵdaı boıynsha oblysta áleýmettik kómek 522 az qamtamasyz etilgen azamatqa kórsetilgen. Balalarǵa tólenetin memlekettik járdemaqyny 1188 otbasy alǵan. Jańa formattaǵy ataýly áleýmettik kómek shartty jáne shartsyz bolyp eki túrge bólinedi. Shartsyz kómek shynymen de muqtaj jandarǵa nemese ómirde qıyn jaǵdaıǵa tap bolǵandarǵa beriledi. Oǵan jeti jasqa deıingi balasy bar jalǵyzbasty analar, birinshi jáne ekinshi toptaǵy múgedekter, kúndizgi bólimde oqıtyn stýdentter kiredi. Shartty ataýly kómek quramynda eńbek etýge qabiletti kem degende bir múshesi bar otbasyna áleýmettik kelisimshart jasasqan jaǵdaıda, sondaı-aq otbasynyń barlyq eńbek etýge qabiletti músheleri jumyspen qamtý sharalaryna mindetti túrde qatysqan jaǵdaıda (turaqty jáne ýaqytsha jumys oryndaryna, jastar tájirıbesi, kásibi nemese mamandyǵy boıynsha oqytý, qaıta oqytý), jeke qosalqy sharýashylyǵyn damytýǵa jáne jeke kásipkerlik qyzmetin uıymdastyrýǵa beriledi». Basqarma basshysynyń aıtýynsha, AÁK ár otbasy múshesine shaqqanda tabysy eń tómengi kúnkóris deńgeıiniń 50 paıyzynan tómen otbasylarǵa kórsetiletin bolady. Oblys boıynsha jańa formatqa baılanysty jumyspen qamtý ortalyqtarynyń shtatyna 95 birlik engiziledi. Onyń 13-i áleýmettik máseleler boıynsha kenesshiler bolsa, 82-si jobalyq assıstentter. Bul maqsatta respýblıkalyq bıýdjetten 113,9 mln teńge bólinedi.
Oblys ákimi vedomstvo basshylyǵynan búgingi tańda turǵyndar arasynda qandaı túsindirý jumystary júrgizilip jatqany týraly surap, kelesi jyly bul ózgeris jurtshylyq úshin tosyn jańalyq bolmaýy kerektigin aıtty.
«Qansha jyldan beri áleýmettik kómek muqtaj jáne jumys isteı almaıtyndarǵa beriletini týraly aıtylyp keledi. Qalalar men aýdandardyń ákimderi jıyndar ótkizip, BAQ-ta aqparat jarııalaý kerek. Bul jumysqa oblystyq, aýdandyq máslıhattyń depýtattaryn tartqan durys», - dedi óńir basshysy Bolat Baqaýov.
