Pavlodar oblysynda 31 eldi mekendi sý basý qaýpi bar

PAVLODAR. QazAqparat – Oblys ákimi Ábilqaıyr Sqaqov kóktemgi sý tasqynyna qarsy jumystardy pysyqtaý maqsatynda TJ jónindegi komıssııanyń otyrysyn ótkizdi, dep habarlaıdy QazAqparat pavlodarnews.kz-ke silteme jasap.

Ábilqaıyr Sqaqov TJ qyzmeti men ákimdikter úshin ýaqyt asa tyǵyz ekendigin aıtyp, olarǵa barlyq resýrstardy jumyldyrýdy jáne sý basý qaýpi bar oryndardy anyqtaýdy tapsyrdy. Óńirdegi jaǵdaı týraly TJ boıynsha departamenttiń basshysy Ernur Ótegenov baıandady. - Osy qysta óńirde qar jalpy normadan 25 paıyz artyq jaýdy. Mundaı jaǵdaı 2017 jyly oryn alǵan edi. Sol kezde erigen qar sýy 7 turǵyn úı jáne 27 aýlany basyp, temirjolda 1, avtomobıl joldarynda 38 sý ótý jaǵdaıy oryn alǵan bolatyn. Qutqarýshylar men ákimdikterdiń málimetteri boıynsha qazirgi kezde 31 aýyldy sý basý qaýpi bar.

– Meniń oıymsha, bul san sizder aıtqannan kóp bolýy múmkin, – dedi aımaq basshysy. – Qater aımaǵyna enýi múmkin ár eldi mekendi baqylaýǵa alý kerek. Aýyldar men qystaýlardy jem-shóppen, dúkender men dárihanalardy azyq-túlik jáne dári-dármek qorymen qamtamasyz etý qajet. Tótenshe jaǵdaı týyndaǵanda adamdarmen baılanys úzilmeýi tıis.

Ábilqaıyr Sqaqov TJ qyzmetterine kóktemgi sý tasqynyna daıyn bolýyn, al, qalalar men aýdandardyń ákimderine eldi mekenderdegi qardy tezdetip shyǵarýdy tapsyrdy. Sonymen qatar, tótenshe jaǵdaıda dereý áreket jasaý jáne halyqqa habar taratý úshin biryńǵaı kommýnıkatsııa jelisin uıymdastyrýdy tapsyrdy.