Pavlodar oblysynda 30 myńnan astam gektar jerge hımııalyq óńdeý jasalǵan
ASTANA. QazAqparat - Bıyl Pavlodar oblysynda shegirtkeniń aldyn alý úshin bıýdjetten 45 mıllıonǵa jýyq aqsha bólinip, 30 myń 722 gektar jerge hımııalyq óńdeý jasaldy, dep habarlaıdy pavlodarnews.kz..
Bul týraly oblystyq aýmaqtyq ınspektsııa basshysynyń orynbasary Jolaman Boranbaev agenttik tilshisine bergen suhbatynda málim etti.
«Shegrtkeni ýlaý jumystaryn aldyn ala jasalǵan boljamǵa baılanysty júrgizemiz. Byltyrǵy zertteý jumystaryna sáıkes 30 myń 722 gektar jerge hımııalyq óńdeý júrgizýge jospar jasalǵan. Onyń 20 myń 900 gektary saıaq shegirtkege qarsy. Sondaı-aq, aýyl sharýashylyǵy qojalyqtaryna qarasty 17 myń gektar jer taǵy belgilengen bolatyn. Búgingi kúnge deıin osy jerlerdiń barlyǵyna tazalyq jasaldy. Pavlodar oblysynda jalpy 12 mln. gektar jer bolsa, biz onyń 8-10 paıyzyn ǵana qamtýdamyz», - deıdi Jolaman Boranbaev.
Spıkerdiń aıtýynsha shegirtkeniń eki túri bar. Biri - toptyq shegirtke, ekinshisi - saıaq shegirtke. Tabıǵattyń bul jándigi kóbinde qumdy jerlerge qaptaıdy. Máselen, bizdiń oblysta Lebıaji, Pavlodar, Kachır aýdandarynyń jerlerine túsedi eken.
«Shegirkeniń bıologııalyq kóterilisi degen bolady. Ol 10 jylda bir qaıtalanady. Pavlodar oblysynda 2000 jyly shegirtkeniń bıologııalyq kóterilisi bolyp, 1 mıllıonnan astam jerge hımııalyq óńdeý jumysyn júrgizdik. Odan keıin kóp shegirtke túsken joq bolatyn. Sondyqtan, hımııalyq óńdeý júrgizetin jer kólemin de azaıtqan edik. Biraq, bıyldan bastap shegirtke túsý qaýpi baıqalǵandyqtan, qaıta kóbeıtip jatyrmyz. Máselen, bıyl 30 myń bolsa, kelesi jyly 50 myńǵa jetkizýimiz múmkin», - deıdi ol.
