Pavlodar oblysynda 3,1 mlrd teńge kóleminde paıdaly qazbalardyń zańsyz óndirisi anyqtaldy
PAVLODAR. QazAqparat - 2019 jyly Pavlodar oblysynda 74 kelisimsharttyq jer qoınaýyn paıdalaný obektilerinde 61 kásiporyn paıdaly qazbalardy óndirýmen aınalysqan, dep habarlaıdy pavlodarnews.kz.
Ekologııa departamentiniń basshysy Іlııas Quramysov jer qoınaýyn paıdalanýshylardyń negizgi bóligi - áktas, qurylys tasy, qum, qaptaý tasy, saz, kirpish sazy, qum-qıyrshyqtas qospasy, as tuzy sııaqty paıdaly qazbalardy óndirýmen shuǵyldanatyndyǵyn málim etti. Jer qoınaýyn paıdalaný obektilerin baqylaý, paıdaly qazbalardy zańsyz aýlaýdy boldyrmaý maqsatynda atalmysh Departament oblystyń jergilikti polıtsııa qyzmetimen birlese otyryp, Jol kartasyn ázirledi. Sondaı-aq mobıldik top quryldy. Jańa jabdyq - Galaxy G1 modeliniń ǵalamdyq navıgatsııalyq spýtnık júıesin paıdalanýdyń arqasynda 3,1 mlrd teńgeden astam soma kóleminde paıdaly qazbalardy zańsyz óndirýdiń 8 faktisi anyqtaldy.
Іlııas Quramysovtyń aıtýynsha, Aqsý qalasynyń aýyldyq aımaǵynda Bereke kentiniń aýmaǵynda jerseriktik júıeni paıdalana otyryp júrgizilgen reıdtik is-sharalar barysynda 23 441,1 tekshe metr kóleminde qum-qıyrshyqtas qospasyn óz betimen óndirý faktileri anyqtalǵan. Onyń ekologııalyq zalal somasy 365 mln teńgeni qurady. Osyndaı buzýshylyqtarǵa Pavlodar qalasyndaǵy «Dostyq» shaǵynaýdanynyń qurylys aýmaǵyn josparlaý boıynsha jumystardy júzege asyrý kezinde jol berilgen. Kenjekól aýyldyq okrýgindegi karerden zańsyz 236 myń tekshe metr qum alý nátıjesinde somasy 2,3 mlrd teńgege ekologııalyq shyǵyn keltirilgen. Qazirgi ýaqytta zańsyz aýlaýdyń barlyq faktileri boıynsha sotqa deıingi tergeý júrgizilýde.