Pavlodar oblysynda 27 aýyldy kóktemde sý basýy múmkin
PAVLODAR. QazAqparat - Pavlodar oblysynda bıyl normadan 25 paıyzǵa artyq qar jaýǵan, dep habarlaıdy QazAqparat pavlodarnews.kz silteme jasap.
Oblys ákimdiginde kóktemgi sý tasqynyna daıyndyq máseleleri boıynsha ótken jıynda tótenshe jaǵdaılar departamentiniń basshysy Ernur Ótegenov osyndaı málimetti jarııalady.
«Kóktemgi sý basý qaýpine áser etetin faktorlardyń biri – bıyl jaýǵan qar kólemi normatıvti mólsherden 25 paıyzǵa artyq bolýy. Bundaı jaǵdaı 2017 jyly bolǵan. Kórshi oblystarmen shekaralas aımaqtardaǵy qar da qaýip tóndirip tur. Aqmola oblysynda qardyń kólemi normatıvti mólsherden 70 paıyzǵa, Shyǵys Qazaqstan oblysynda 30 paıyzǵa artyq. Qaraǵandy oblysynyń Buqar jyraý aýdanyndaǵy jaǵdaı da osyǵan uqsas», - dedi Ernur Ótegenov.
Departament basshysynyń aıtýynsha, Pavlodar oblysynda qar sýynyń saldarynan Baıanaýyl aýdanynda 7, Pavlodar men Ekibastuz qalasy, Aqtoǵaı men Pavlodar aýdandarynda 2, Aqsý qalasyna qarasty 1 aýylǵa qaýip tónip tur.
Al, sý qoımalarynyń sý jiberý áserinen 11 eldi meken qaterli aımaq aýmaǵynda. Sonymen qatar, oblystaǵy 1 396 sý jiberý qubyrlarynyń 530-y ǵana tazalanǵan. Eldi mekenderden 736 myń tonnadan astam qar shyǵarylǵanmen, qar azaımaǵan aýyldar áli kóp.
«Sý tasqynymen kúres jáne onyń saldaryn joıý úshin qalalar men aýdandardyń ákimdikteri 28,7 myń dana qap, 10 700 tonna ınertti materıal, 108 tonna janar-jaǵarmaı qoryn ázirledi. Sondaı-aq tótenshe jaǵdaı oryn alǵan jaǵdaıda tamaqtanýdy uıymdastyrý úshin 88 jáne muzdy jarý jumystaryna 5 kelisimshart jasaldy», - dedi departament basshysy.
Oblys ákimi Ábilqaıyr Sqaqov bıyl joldardaǵy qar tazalaý jumysy tııanaqty atqarylmaǵanyn aıtyp, eskertý jasady.
«Maǵan turǵyndardan Aqtoǵaı men Ertis aýdandaryndaǵy jolda birneshe kún qar qursaýynda qalǵandary týraly hat kelip tústi. Ol joldar respýblıkalyq mańyzy bar jol bolǵanmen jolda qalǵan adamdar aýdandardyń turǵyny. Odan bólek, negizgi sanalatyn, Pavlodar – Nur-Sultan baǵytyndaǵy «Qazavtojol» jaýap beretin joldy da qar basyp qalýda. Demek, qar tazalaý jumysy durys atqarylmaǵan. Qajet bolsa, biz bul máseleni Úkimettiń deńgeıinde kóteretin bolamyz», - dedi oblys ákimi. Oǵan qosa, oblys ákimi aýdan ákimderi men jaýapty uıymdarǵa sý basý qaýpine baılanysty jaǵdaıdy 10 kúnniń ishinde retke keltirýdi tapsyrdy.
