Pavlodar oblysynda 250 oryndyq mektep ashyldy

PAVLODAR. QazAqparat - Pavlodar aýdanynyń Kemeńger aýylynda oqý bir aýysymda júrgiziledi, dep habarlaıdy QazAqparat oblys ákiminiń baspasóz qyzmetine silteme jasap.

Kúrdeli jóndelip, qosymsha ǵımarat salynǵannan keıin bastaýysh mektep paıdalanýǵa berildi. Oqý orny «Zamanaýı mektep» jobasy boıynsha jabdyqtalǵan. Ǵımaratta 12 kabınet, akt jáne sport zaly, kitaphana, ashana jáne medıtsınalyq blok bar. Bastaýysh býynnan basqa, munda endi mektepaldy daıarlyq kýrsy júrgiziledi.
«Kemeńgerde 350 oryndyq mektep bar, biraq onyń qýaty tek eki aýysymda - tańǵy 8-den keshki 8-ge deıin jumys isteý úshin jetkilikti bolǵan edi. Endi joǵarǵy synyptar da, bastaýysh mektep te bir aýysymda oqıdy. Balalar jańa mektepti kórdi jáne olar qaıtadan partaǵa otyrý úshin karantınniń aıaqtalǵanyn asyǵa kútip júr», - deıdi Pavlodar aýdanynyń bilim berý bólimi basshysynyń mindetin atqarýshy Sáýle Nurǵalıeva.

Ǵımarat «Jumyspen qamtýdyń jol kartasy» baǵdarlamasy aıasynda jóndeldi. Synyptarǵa Pavlodarda jasalǵan jıhazdar satyp alyndy.
«Bıylǵy jyly «Jumyspen qamtýdyń jol kartasy» arqasynda biz áleýmettik ınfraqurylym nysandaryna qatysty kóptegen máseleni sheshtik. Otandyq qurylys ındýstrııasyn jáne qurylys materıaldaryn, jıhaz jáne basqa da ónim shyǵaratyn jergilikti óndirýshilerdi qoldaýǵa múmkindik týdy. Ortaq tapsyrmany birge oryndadyq», - dep atap ótti Táýelsizdik kúni jańa mektepke barǵan Pavlodar oblysynyń ákimi Ábilqaıyr Sqaqov.
Óńir basshysy Kemeńgerde «Ertis» joǵary ınnovatsııalyq agrarlyq kolledjine bardy. Bıylǵy jyly munda ashana keńeıtilip, qaıta jabdyqtaldy jáne oqý ornynyń korpýsynyń birinde agroónerkásiptik keshen mamanyn daıarlaý úshin quzyret ortalyǵy jabdyqtaldy. Bolashaq temir ustasy, traktorshy men kombaıner álemniń úzdik óndirýshileri - John Deere, CLAAS jáne basqalardyń sımýlıatory men aýyl sharýashylyǵy tehnıkasyn qoldaný arqyly oqıtyn bolady.

«Maqsatymyz – respýblıka deńgeıinde jattyǵý bazasyna jáne aýyl sharýashylyǵy mamandary arasynda kásibı quzyrettilik boıynsha chempıonattardy ótkizý alańyna aınalý. Sondaı-aq biz tehnıkaǵa qyzmet kórsetý jáne jóndeý qyzmetterin kórsetýdi josparlap otyrmyz», - dedi kolledj basshysy Aıgúl Baıjumanova.
Pavlodar oblysynyń ákimi jobaǵa tolyq qoldaý bildirip, búginde óńirlik agroónerkásipke zamanaýı standarttar boıynsha daıyndalǵan qyzmetkerler qajet ekenin atap ótti. Ábilqaıyr Sqaqov kolledj ınfraqurylymyn mamandardy oqytý úshin ǵana emes, qosymsha kýrstyń kómegimen olardyń biliktiligin arttyrý úshin de paıdalanýdy usyndy.