Pavlodar oblysynda 204,3 myń gektar jer paıdalanylmaýda

Onyń ishinde 141,2 myń gektar - egistik alqaptary bolsa, 58,5 myń gektary - jaıylymdyq jáne 4,6 myń gektary - shabyndyq jerler. Bul týraly oblystyq ákimdikte ótken jıyn barysynda jer qatynastary basqarmasynyń basshysy Rýslan Dáýitbaev aıtty, dep habarlaıdy pavlodarnews.kz .

«2017 jyldyń 1 qańtarynda aýyl sharýashylyq maqsatta 336,2 myń gektar jer paıdalanylmaǵan bolatyn», - dedi Rýslan Dáýitbaev. - Qoldanylmaǵan jer telimderi boıynsha birqatar jumys júrgizildi. Memleket menshiginiń ıeligine 176,5 myń gektar qaıtarylsa, 75 myń gektar aýmaq qoldanysqa berildi. Bıyl kóktemgi egis jumystarynyń qorytyndysy boıynsha qosymsha 128,1 myń gektar jer anyqtaldy. Eseptik kezeńde 103 jer qoldanýshy joǵary mólsherleme boıynsha 10,7 mıllıon teńge somasynda jer salyǵyn tóleýge tartyldy. Jer paıdalanýshylar 43,6 myń teńgeni quraıtyn 164 ýchaskeni óz erkimen qaıtardy».

 Basqarma basshysynyń aıtýynsha, bıylǵy jyly aýyl sharýashylyǵy aınalymyna 554,5 myń gektar alqapta 890 ýchaske berilgen. Onyń ishinde konkýrs negizinde 358 myń gektar 541 jer ýchaskesi jalǵa usynylǵan. Jalǵa berý jáne jalǵa berý quqyǵyn, jer telimin satyp alý jáne jer salyǵy esebinen túsken qarjy 3 mlrd 481 mln teńgeni quraıdy. Bul rette, oblys ákimi Bolat Baqaýov oralmandarǵa jer telimderin usyný qalaı júzege asyrylyp jatqany jóninde surady. - Oblysqa jyl saıyn etnıkalyq qazaqtar keletini belgili, - dedi óńir basshysy. - Baýyrjan Qazbekuly, bıyl «Uly dala eli» festıvalinde jıyn ótkizgen kezde oralmandarǵa jer usyný eshbir qıyndyq týdyrmaıtynyn aıtqan bolatynsyz. Olar jer ýchaskelerin aldy ma? Jer telimderin ıgerý kezek kúttirmeıtin másele. Elbasy Joldaýynda aýyl sharýashylyǵy ekonomıka salasynyń mańyzdy bóligi ekeni aıtylǵan. Árbir ákim ekonomıkamen aınalysýy tıis. Oblys ákiminiń orynbasary Baýyrjan Qasenov jer kodeksine sáıkes oralmandar men qonys aýdarýshylarǵa aýyl sharýashylyǵy maqsatyndaǵy jer telimderi  eshbir qıyndyqsyz usynylatynyn atap ótti.