Pavlodar oblysynda 2022 jyly sýarmaly jer kólemi 4 esege kóbeıedi
PAVLODAR. QazAqparat - Pavlodar oblysynyń ákimi Bolat Baqaýov Aqsýdyń eldimekenderine jasaǵan saparynda Ertis óńiriniń 5 jylǵa arnalǵan sýarmaly jer kólemin arttyrý boıynsha keshendi josparyn tanystyrdy, dep habarlaıdy pavlodarnews.kz.
Sýarmaly jer kólemin damytý jospary Evgenevka aýyldyq okrýgindegi sýarmaly jerleriniń arqasynda oblystaǵy damýshy jáne ónimdi seriktestikterdiń qataryna engen «Tımýr» ShQ-da fermerlerge arnalǵan jıynda tanystyryldy.
Búgingi kúnde «Tımýr» ShQ qoldanyp otyrǵan 2000 gektar jerdiń 850-i saýarmaly. Kartoptyń ónimdiligi turaqty. Gektarynan 450-500 tsentner kartop, myń tsentnerge deıin sábiz alady. 2011 jyly ShQ quny 250 mln teńgelik kókónis qoımasyn salǵan. Sońǵy eki jylda qosymsha 5 myń tonnaǵa arnalǵan tońazytqysh jáne jýý men qaltalaý tsehyn iske qosty. Jalpy, sońǵy 7 jylda sharýashylyq óziniń damýyna 2,5 mlrd teńge ınvestıtsııa quıdy. Keńes zamanyna qalǵan 75 myń gektar sýarmaly jerdiń búginde 65 paıyzǵa jýyǵy paıdalanylady. Burynǵy deńgeıge jetý úshin taǵy 20 myń gektardy ıgerý kerek.
«Pavlodar oblysyn óndiristik óńir retinde sanaý qalyptasqan, - dedi Bolat Baqaýov. - Biraq bizde agrarly sala da damýda. Oblysymyzda 1,2 mıllıon gektar jerge túrli tuqym sebiledi. Sýarmaly salaǵa erekshe nazar aýdaramyz. Mysalǵa Ertis aýdanynyń jaqsy jerleriniń 60 myń gektaryna astyq sebetin jáne Aqsýdyń eldimekeninde myń gektar sýarmaly jer paıdalanatyn kásipkerlikti keltirýge bolady. Ekonomıkalary birdeı. Buny ár sharýashylyqtyń ıelerine jáne jańa bastap jatqan fermerlerge túsindirdik. Biz sýarmaly jerdi damytý boıynsha Qazaqstanda pılottyq joba bolatyn 5 jyldyq jospar quryp qoıdyq. Qazirgi kezde ár aýdannan 7-den 20 gektarǵa deıingi jer tanabyn tańdap qoıdyq. Áleýmettik-kásipkerlik korporatsııa arqyly jetkizetin ınjenerlik ınfraqurylymnyń jobasyn daıyndaımyz. Sodan keıin qarjyny, tehnıkany taǵy basqalaryn qaıdan alatynymyzdy anyqtaımyz. 5 jyldyń ishinde biz sýarmaly jerdiń kólemin 4 esege arttyrý kerekpiz. Sýarmaly jermen qatar mal sharýashylyǵy da damıtyn bolady».
Aıta keteıik, Aqsýdyń eldimekeni arqyly Ertis, Belaıa ózenderi jáne Ertis-Qaraǵandy kanaly ótetindikten aýmaqta sýarmaly alqapty keńeıtý úshin barlyq jaǵdaı jasalǵan.
