Pavlodar oblysynda 2019 jyl bastalǵaly bes adam órtten kóz jumdy
ASTANA. QazAqparat - Jańa jyl bastalǵaly Pavlodar oblysynda 18 órt oqıǵasy tirkelgen, dep habarlaıdy pavlodarnews.kz.
Bul týraly óńirlik kommýnıkatsııalar qyzmetinde ótken baspasóz jıynynda oblystyq TJD órt salasyndaǵy qaýipsizdikti baqylaý jáne profılaktıkalyq qyzmet basqarmasy bastyǵynyń orynbasary Álimqan Qaıyrkeldi málim etti.
- Bıylǵy jyly segiz kúnniń ishinde órt saldarynan bes adam, onyń ishinde bir bala qaza tapty, - dedi Álimqan Qaıyrkeldi. - Bes adam jaraqat aldy. Al, 2018 jyly óńirimizde 873 órt tirkeldi. Oqys oqıǵalardan kelgen materıaldyq shyǵyn 110 mıllıon 436 myń teńgeni qurady. Órtte 34 adam kóz jumyp, 33 adam jaraqattandy.
Álimqan Qaıyrkeldiniń aıtýynsha, 2018 jyly 2017 jylmen salystyrǵanda órt sany 7 paıyzǵa azaıǵan. Adam ólimi 36 paıyzǵa kóbeıip, materıaldyq shyǵyn 9 paıyzǵa tómendegen.
- Oqys oqıǵalardyń aldyn alý maqsatynda ótken jyly azamattyq qorǵanys organdarynyń qyzmetkerleri jergilikti polıtsııa ókilderimen birlesip, oblys aýmaǵyndaǵy turǵyn úı sektorynyń 101 myń 751 aýlasyn aralady. Nátıjesinde 225 myń 503 adam qamtyldy. Aýlalardy aralaý barysynda turǵyndar arasynda pesh quraldaryn ornatý jáne qoldaný barysyndaǵy órt qaýipsizdigi, elektr quraldary men gazballon qurylǵylaryn qoldaný erejeleri, talaptary túsindirildi.
Sondaı-aq jergilikti atqarýshy organdary men PIK ókilderi 24 myń 878 adamdy qamtyp, 949 jıyn ótkizgen.
