Pavlodar oblysynda 200-den astam mektepte asyq oıyny úıirmeleri ashyldy
«Pavlodar oblysynda «Serpin» baǵdarlamasy boıynsha bilim alyp jatqan myń jarymǵa jýyq jas «Rýhanı jańǵyrý» baǵdarlamasyna belsendi qatysyp, aımaǵymyzdyń ósip-órkendeýine úlesterin qosyp jatyr. Oqý ornyn aıaqtaǵan olardyń kópshiligi oblysta qalýǵa nıet bildirýde. Ótken jyly oqý oryndaryn aıaqtaǵan 67 jas túlektiń on ekisi týǵan ólkelerine oralsa, 55-i óńirimizde qaldy. Biz olardy jergilikti atqarýshy organdar arqyly jumysqa ornalastyrdyq», - dedi oblys ákimi Bolat Baqaýov elordada ótken baspasóz máslıhatynda.
Sondaı-aq óńir basshysy «Rýhanı jańǵyrý» baǵytynda oblystyń joǵary oqý oryndary nátıjeli jumystar atqaryp jatqandyǵyn tilge tıek etti.
«Pavlodar memlekettik pedagogıkalyq ýnıversıteti HІH ǵasyrdyń tarıhı tulǵasy - Sultanbet Sultannyń tarıhı ordasyn qaıta qalpyna keltirdi. Qazirgi tańda bul keshende arheologııalyq zertteý ortalyǵy jumys jasaıdy. Buǵan qosa, Pavlodar oblysynan shyqqan 100 tarıhı tulǵa týraly tanymdyq kitaptar, ólketaný baǵyty boıynsha ǵylymı monografııalardy jaryqqa shyǵarý josparda bar. Osy baǵytta júzege asyp jatqan jobalardyń biri - oblys oqýshylary arasyndaǵy asyq oıyny. Asyq oıyny boıynsha úıirmeler 200-den astam mektepte 4 myńǵa jýyq balany qamtydy», - dedi Bolat Baqaýov.
Sonymen qatar, «Mektebime taǵzym» sharasy aıasynda oblys mektepteriniń 765 túlegi 163 mln teńge kómek kórsetken.
«146 robottehnıka kabınetteri jasaqtaldy. Osy jyldyń basty jobalarynyń biri - «Rýhanı jańǵyrý» kabınetteriniń ashylýy boldy. Kabınetterde atalmysh baǵdarlamanyń barlyq baǵyttary kórinis tapty», - dep atap ótti oblys ákimi.
