Pavlodar oblysynda 19 jastaǵy muǵalimdi zorlaǵan kúdikti sottaldy
PAVLODAR. QazAqparat – Pavlodar oblysynyń Aqqýly aýdanynda 19 jastaǵy muǵalimdi zorlaǵan aýyl turǵynyna sot úkimi shyqty, dep habarlaıdy QazAqparat pavlodarnews.kz saıtyna silteme jasap.
Іs Pavlodar oblysynyń qylmystyq ister jónindegi mamandandyrylǵan aýdanaralyq sotynda qaraldy. Prokýror kinálini 15 jylǵa bas bostandyǵynan aıyrýdy surady. Sottalýshy óz kinásin jartylaı moıyndady.
Aıyptalýshy jáne onyń advokaty eń jeńil jaza taǵaıyndaýdy surady. Alaıda, zardap shekken qyzdyń jáne kýágerlerdiń aıǵaqtarymen, saraptama qorytyndysymen qylmys tolyǵymen dáleldengen.
Aqqýly aýdanynyń 30 jastaǵy turǵynyna jábirlenýshiniń densaýlyǵyna aýyr zııan keltirgen zorlaý faktisi (QR QK 120-baby, 3-bóligi, 2-tarmaǵy) jáne óltiremin dep qorqytýmen ushtasqan, jynystyq sıpattaǵy zorlyq-zombylyq jasaý faktisi boıynsha (QR QK 121-baby, 2-bóligi, 2-tarmaǵy) aıyptaý úkimi shyǵaryldy.
«Sottyń úkimimen oǵan 15 jylǵa bas bostandyǵynan aıyrý jazasy taǵaıyndaldy. Bul – zańmen belgilengen eń aýyr jaza. Jazany óteý qaýipsizdigi barynsha joǵary mekemede belgilendi», - dedi sýdıa Nurlan Aıtbaev.
Sonymen qatar, aýyl turǵyny kámeletke tolmaǵan balalarmen jumys isteýge baılanysty jáne pedagogıkalyq laýazymdyq qyzmetterdi atqarý quqyǵynan ómir boıyna aıyryldy.
Budan bólek, muǵalimniń paıdasyna moraldyq zııan retinde 2 mıllıon teńge kóleminde ótemaqy óndirildi.
Úkim zańdy kúshine engen joq.
Eske salaıyq, 19 jastaǵy aýyl muǵalimin zorlaý oqıǵasy týraly bıylǵy aqpan aıynda habarlanǵan bolatyn. Kóp uzamaı, kúdikti qolǵa tústi. Ol buǵan deıin urlyq jasaǵany úshin jaýapqa tartylǵan. 2017 jáne 2018 jyldary Pavlodar oblysynyń tergeýshileri qylmystyq isterdi sotqa joldaǵan. Alaıda, sot barlyq isterdi taraptardyń bitimge kelýine baılanysty toqtatqan.
Boıjetken men er adam bir-birin tanymaǵan. Іzdeý sharalary barysynda kúdikti kórshi aýylda jasyrynǵan.
