Pavlodar oblysynda 162 jylytý pýnkti daıyndaldy
PAVLODAR. QazAqparat - Pavlodar oblysynda 14 550 adamǵa laıyqtalǵan 162 jylytý pýnkti daıyndaldy, dep habarlaıdy Ravlodarnews.kz.
Óńirlik TJ departamenti TJ joıý basqarmasynyń bastyǵy, azamattyq qorǵaý podpolkovnıgi Asqarbek Omarovtyń aıtýynsha, qutqarý operatsııalaryn júrgizýge daıyndyq maqsatynda departament tekserý júrgizip, joǵary ótý tehnıkalaryn daıyndaǵan.
«Qar qursaýynan zardap shekkenderge kómek kórsetý, sondaı-aq adamdardy evakýatsııalaý úshin Ekibastuz qalasy men Aqtoǵaı aýdanyna ótimdiligi joǵary tehnıka men múlik kóshirildi, - deıdi Asqarbek Omarov.
Búgingi kúni «Qazaqavtojol» JShS oblystyq fılıalynda tehnıkanyń naqty daıyndyǵy 78%-dy quraıdy, qolda bary - 86, jaramdysy – 69 jáne jóndeýde 17 tehnıka bar.
Aýa raıynyń qolaısyzdyǵyna baılanysty 2020 jyly 51 daýyldy eskertý kelip túsken. Pavlodar oblysynyń jolaýshylar kóligi jáne avtomobıl joldary basqarmasy men «QazAvtoJol» AQ fılıalynyń sheshimi boıynsha respýblıkalyq jáne oblystyq mańyzy bar avtomobıl joldarynda 70 ret shekteý engizilgen.
Olardyń ishindegi eń problemaly ýchaskeler: Shiderti kentinen Aqmola oblysynyń shekarasyna deıin «Nur-Sultan – Ereımentaý - Shiderti» avtokólik joldary. Osyǵan uqsas jaǵdaılarǵa jol bermeý maqsatynda bıylǵyaǵy qysqy kezeńde DEÝ-60 tehnıkasy Qalqaman kentine kóshirildi.
Sondaı-aq, ótken qysqy kezeńde aınalma joldyń saldarynan tehnıka keptelisi oryn alǵan Shiderti kentindegi kópirdi qaıta jańartý aıaqtaldy.
