Pavlodar oblysynda 150-den astam kólik qar qursaýynan shyǵaryldy
PAVLODAR. QazAqparat - Pavlodar oblysynda 150-den astam kólik qar qursaýynan shyǵarylyp, 140 adam jylytý pýnktterine jetkizildi, onyń 15-i -balalar, dep habarlaıdy QazAqparat Pavlodarnews.kz saıtyna silteme jasap.
5 naýryz kúni saǵat 12:30-da boranǵa, nashar kórinýge, aýa raıynyń nasharlaýyna baılanysty Nur-Sultan - Shiderti tas jolynyń 200-254 shaqyrymynda Shiderti kentinen Aqmola oblysynyń shekarasyna deıingi avtomobıl jolynda kólik quraldarynyń barlyq túrleri úshin qozǵalys jabyldy.
- Jeldiń kúsheıýine baılanysty qozǵalys eki baǵytta da jabyldy. Biraq sol ýaqytta 500-ge jýyq kólik Nur-Sultannan shyǵyp ketken bolatyn. Sonyń ishinde joldyń kórinbeýinen, daýyldyń saldarynan qar qursaýynda qalǵandar bar. Pavlodar oblysyna kirip úlgergen kólikter sany - 150-170, - dedi «QazAvtoJol» AQ oblystyq fılıalynyń dırektory Aqylbek Qabyldın óńirlik kommýnıkatsııalar qyzmetinde ótken jıynda.
Jol qyzmetkerleri joldy tazalaýdan jeńil mashınalardan júk kólikterine deıin qarǵa keptelgen mashınalardy shyǵarýǵa kóshti.
Aıta keteıik, keshe keshke Semeıge shyǵatyn baǵyttan basqa, Pavlodar oblysy arqyly ótetin barlyq respýblıkalyq joldar jabyldy.
Qazir kólikterdiń kolonnalary bir qatarǵa jınaqtaldy. Qatardyń aldyńǵy jáne artqy jaǵynda jol qyzmetkerleriniń kólikteri bar. Arnaıy tehnıkanyń súıemeldeýimen kele jatqan kolonna saǵatyna 5-10 shaqyrymnan aspaıtyn jyldamdyqpen qozǵalyp keledi.
Aqylbek Qabyldınniń aıtýynsha, eń kóp degende eki saǵat ishinde barlyq mashınalar qardan shyǵarylyp, Shiderti kentine deıin jetkiziledi. Bul ýchaskede 10-nan astam tehnıka jumys isteýde.
Oblystyq tótenshe jaǵdaılar departamentiniń basshysy Ernur Ótegenovtiń aıtýynsha, túnde 5 jylytý pýnktine 140 adam ákelindi, onyń 15-i balalar. 61 adam qutqaryldy, onyń 11-i balalar. 63 adam evakýatsııalandy, onyń ishinde 7 bala bar. Sondaı-aq qar qursaýynan 32 jeńil jáne 3 júk kóligi shyǵaryldy.
- Daýyl týraly eskertý eki kún buryn berilgen. Aqmola oblysy baǵytynda kúrdeli jaǵdaı qalyptasty. Sondyqtan keshe saǵat 14:30-da biz shtab pen senim telefonyn ornalastyrdyq. Oǵan 9 qońyraý tústi. Jolda balalarymen birge qalǵan bir avtokólik júrgizýshisine psıhologııalyq kómek kerek boldy. Olar qaýipsiz jerge jetkizildi, - dedi Ernur Ótegenov.
Sonymen qatar, Jelezın aýdanynda túnde 50-ge jýyq kólik keptelip qaldy. Munda jylytý pýnkti «Arman» sport kesheninde, sondaı-aq Tereńkól aýdanynda Fedorovka aýylyndaǵy «Samal» kafesinde ashyldy. Aqtoǵaı aýdanynda Qojamjar aýylynda 7 adam agrotehnıkalyq kolledjge evakýatsııalandy.
Tótenshelikter taǵy eki balyqshyny qutqardy. Olardyń kóligi Ekibastuz mańyndaǵy 11-sorǵy stantsııasynda isten shyqqan.
Qazir Pavlodar oblysynyń Aqmola oblysy baǵytyndaǵy 9 joly jabyq.
- Biz kólikterdi shyǵarmaıynsha, qardy tazalaý qıyn, - dedi Ernur Ótegenov. - Túnde jumys júrgizildi. Bas tartqandar kólikterinde qaldy, al ony qalamaǵandar evakýatsııalandy. Tehnıkalar jumys istep tur: 2 jol talǵamaıtyn TREKOL jáne 2 KamAZ.
