Pavlodar oblysynda 1200-ge jýyq jetim bala otbasyn tapqan
ASTANA. QazAqparat - Pavlodar oblysynda sońǵy úsh jyldyń ishinde 1172 jetim bala patronattyq tárbıe júıesi arqyly otbasylardyń qamqorlyǵyna berilgen.
Bul týraly búgin «Qoǵamdyq kelisim» memlekettik mekemesinde ótken jetim balalarǵa arnalǵan bilim berý uıymdary basshylarynyń respýblıkalyq keńesinde bilim berý basqarmasynyń basshysy Baqyt Bekseıitova málim etti, dep habarlaıdy pavlodarnews.kz.
«Bizdiń óńirde ata-anasynyń qamqorlyǵynsyn qalǵan balalardy qamqorlyqqa alý boıynsha táýir jumys júrgizilýde. Balalar úıinde jaqsy tájirıbe qalyptasqan. Óıtkeni, balalardyń otbasylyq tárbıege ótýi asa mańyzdy», - dedi oblys ákiminiń orynbasary Meıram Begentaev.
Oblystyq bilim berý basqarmasynyń basshysy Baqyt Bekseıtovanyń aıtýynsha, 2017 jyldyń qańtar aıynan bastap jetim balalardy qamqorlyǵyna alǵan otbasynyń anasymen qatar, ákesine de eńbekaqy beriledi. Buǵan deıin balalardy patronattyq tárbıege alǵan úıdiń otanasyna ǵana járdemaqy tólenip kelgen. Sonymen qatar, balalardy óz qamqorlyǵyna alǵysy kelgen ata-analarǵa qoıylatyn talaptar da jeńildemek. «2010 jyldan bastap jetim balalar jáne ata-anasynyń qamqorlyǵynsyz qalǵan 810 bala kontıngentimen 19 uıym jumys istese, 2016 jyly 14 mekemede 484 bala qalǵan. Azamattardyń otbasyna jetkinshekterdi qamqorlyqqa berýdiń nátıjesinde osy baǵytta jumys isteıtin uıymdar sany qysqardy. Azamattardyń otbasyna berilgen 1172 balanyń 802-si qorǵanshylyqqa, 95-i patronattyq tárbıege berilse, 275 balany túbegeıli asyrap aldy. Bıylǵy jyldyń ózinde 259 bala otbasylyq tárbıege ótkizildi», - dedi Baqyt Bekseıitova.
Aıta keterligi, jıyn sońynda oblystyq bilim berý basqarmasynyń basshysy respýblıkalyq keńes múshelerine eki nemese odan da kóp balany qamqorlyǵyna alǵan otbasylarǵa qosymsha eńbekaqy tóleý jóninde usynys bildirdi.
