Pavlodar oblysynda 12 jastaǵy mektep oqýshysy qaryndasyn qutqaryp, erlikpen qaza tapty
ASTANA. QazAqparat - Pavlodar aýdanyndaǵy Efremovka jalpy orta bilim berý mektebiniń 6-synyp oqýshysy Azamat Joldasbek qaryndasyn qutqaryp qalyp, ózi ajal qushty, dep habarlaıdy pavlodarnews.kz .
Jetkinshektiń naǵashy ápkesi Nurgúl Ýahıtovanyń aıtýynsha, 21 mamyr kúni tańerteń Azamat alty jastaǵy inisi Aldııarmen birge mal baǵýǵa ketken. Keshke úıge kelgende anasy ázirlep qoıǵan tamaqtan bas tartyp, qaryndasy Inabatpen birge aýyldyń shetindegi kólge ózderi qoldan jasaǵan aǵash qaıyqty jiberip kelýge ruqsat surap, ketip qalǵan. Qastarynda kórshi úıdiń balalary Savel men Dasha birge bolǵan.
«Sol jerde mal sý ishetin toqtaý sýdyń jaǵasynda jatqan eki metrlik beton tsementke Inabattyń aıaǵy taıyp, qulap ketken. Azamat bolsa, dereý arǵy jaǵynan sýǵa sekirgen. Ol óziniń qaryndasyn jıekke laqtyryp jibergen de, ózi jaǵaǵa shyǵa almaı qalǵan. Ber jaqta qalǵan úsh bala bar daýyspen kómekke shaqyrǵanmen eshkim tabylmaǵan. Dasha jaǵada sýǵa tunshyǵyp essiz jatqan Inabattyń keýdesin qaǵyp, sýdy shyǵara bastaǵan. Ol sol kezde teledıdardan kórgendegideı áreket etkenin aıtady. Ábden shoshyp qalǵan balalar Aldııardyń anasyna júgirip kelip, onyń sýǵa batyp ketkenin aıtqan. Ókinishke oraı, oqıǵa ornyna jetkende balanyń denesi birden tabylmady. Buǵan qosa, kóbi júzýin bilmeıtinin aıtyp, sýǵa túsýden bas tartqan. Sol sátte Dashanyń ákesi kelip qalyp, Azamattyń denesin jaǵaǵa alyp shyqty», - deıdi Nurgúl Ýahıtova.
Mektep dırektorynyń orynbasary Gapý Saparjannyń sózinshe, Azamattyń júregi aýyratyn bolǵandyqtan tizimge alynǵan. Saraptama qortyndysy onyń ókpesinde sý bolmaǵanyn, ıaǵnı júregi toqtap qalǵanyn kórsetip otyr.
«Bul otbasynyń balalary óte tárbıeli. 2-synypta oqıtyn Inabat oqý úzdigi. Aldııar - alty jasta. Azamat tórt pen beske oqıtyn ári aqyldy bala bolatyn. Qazaq-túrik lıtseıine túsýge qujattaryn tapsyryp qoıǵan. Aman bolsa, bıyl sonda bilim alatyn edi. Olar Rojestvenka aýylyndaǵy mektepte qazaq synyptary bolmaǵandyqtan, ózimizdiń ana tilimizde bilim alamyz dep, bizdiń mektepke avtobýs arqyly keletin. Azamattyń jasaǵany úlken azamattardyń qolynan kele bermeıtin is. Bul úlken erlik. Ol óziniń qaryndasyn ajaldan arashalaımyn dep, óz janyn qıdy», - deıdi Gapý Saparjan.
