Pavlodar oblysynda 11 kásiporynnyń aýmaǵynda atmosferalyq aýa tekseriledi

Bul týraly óńirlik kommýnıkatsııalar qyzmetinde ótken baspasóz máslıhatynda oblystyq jer qoınaýyn paıdalaný, qorshaǵan orta jáne sý resýrstary basqarmasynyń basshysy Qadyljan Satıev málim etti, dep habarlaıdy pavlodarnews.kz .

 «Atalǵan kásiporyndardyń segizi Pavlodarda bolsa, bireýi Ekibastuz qalasynda jáne ekeýi Aqsýda ornalasqan», - dedi Qadyljan Satıev. - Bul «Qazaqstan alıýmınııi», JEO-1, JEO-2, JEO-3, KSP Steel, PMHZ, Qazaqstan elektrolız zaýyty, Aqsý ferroqorytpa zaýyty, Eýrazııalyq energetıkalyq korporatsııasy, «Kastıng» kásiporyndary. Jumystar kúndizgi jáne túngi ýaqyttarda júrgizilip, 11 element boıynsha 7520 synama alynbaq. Jalpy, Pavlodar oblysy kóp jyldar boıy ónerkásip, tústi jáne qara metallýrgııa, elektr, jylý energııasyn óndirý, munaıdy qaıta óńdeý jáne glınozem óndirisi boıynsha qarqyndy damyǵan aımaqtardyń biri bolyp tabylady. Degenmen bul salalardyń damýy aımaqtyń ekologııalyq jaǵdaıyna keri áserin tıgizýde. Elimizde qorshaǵan ortaǵa tastalatyn zııandy zattardyń tórtten bir bóligi (98 paıyzy) Pavlodar oblysynyń úsh qalasyna - Pavlodar (26 paıyz), Aqsý (24 paıyz) jáne Ekibastuz (paıyz) keledi. Sondyqtan óńirdiń atmosferalyq basseıniniń lastanýy mańyzdy máselelerdiń qataryna jatady.

 Spıkerdiń aıtýynsha, sońǵy úsh jyldyń ishinde qorshaǵan ortany lastaıtyn qaldyqtardyń azaıýy baıqalady. Máselen, 2016 jyly 2014 jylmen salystyrǵanda 11%-ǵa kemigen. Jer qoınaýyn paıdalaný, sý resýrstary men qorshaǵan ortany qorǵaý basqarmasy tarapynan ónerkásiptik aýmaqtaǵy aýanyń sapasyn baǵalaý jumystary sońǵy úsh jyl boıy júrgiziledi. Basty maqsat - táýliktiń túngi ýaqyty eskerilip, aýanyń sapasyn anyqtaý. Óıtkeni, turǵyndar tarapynan shaǵymdar kóbinese keshki jáne túngi ýaqytta túsedi.

"Synamalardy alý baǵdarlamasyna jyl saıyn ózgerister engizilip turady. Máselen, 2015 jyly osy tektes jumystar segiz kásiporynnyń sanıtarlyq-qorǵaý zonalarynyń shekaralarynda júrgizildi (Pavlodar qalasynda - 6 jáne Aqsý qalasynda - 2). Nátıjesinde saraptalatyn elementterdiń shekti normadan asýy úsh nysanda anyqtaldy. Bul - Aqsý ferroqorytpa zaýyty, «Qazaqstan alıýmınııi»  AQ, «KSP Steel». Osy nysandarǵa qatysty tıisti sharalar qolǵa alynyp, shamamen 1 mıllıon teńgege jýyq aıyppul salyndy. 2016 jyly monıtorıng júrgizilgen 10 nysannyń ishinde lastaıtyn zattardyń normatıvtik mólsherinen asyp ketýi  Aqsý ferroqorytpa zaýyty,  EEK, «Qazaqstan alıýmınııi» kásiporyndarynyń sanıtarlyq-qorǵaý aımaqtarynda  tirkeldi", - deıdi Qadyljan Satıev.