Pavlodar oblysynan «Nur Otan» partııasynyń HІH sezine 35 delegat qatysady
Konferentsııa kezinde partııa Tóraǵasynyń tapsyrǵan «Baqytty otbasy», «Halyqqa kómek», «Aýyl - el besigi» jáne «Qutty meken» ulttyq jobalarynyń júzege asyrylý barysy talqylandy. Partııa oblystyq fılıalynyń tóraǵasy, óńir basshysy Bolat Baqaýov aıtyp ótkendeı, atalǵan jobalar partııa kóshbasshysy Nursultan Nazarbaevtyń halyqtyń ál-aýqatyn kóterý jónindegi tapsyrmasyn oryndaý maqsatymen ázirlengen. - «Halyqqa kómek» jobasynyń maqsaty turǵyndardyń kúndelikti problemalaryn sheshýge atsalysý bolyp tabylady, - deıdi partııa oblystyq fılıaly tóraǵasynyń birinshi orynbasary Nıkolaı Dychko. - Osy oraıda oblystaǵy barlyq qoǵamdyq qabyldaý bólmelerinde 14 áleýmettik tereze ashyldy. Sol arqyly azamattar kez kelgen suraǵyn joldaı alady. Osy kúnge deıin 673 ótinish túsip, olardyń 67 oń sheshimin tapty.
Nıkolaı Dychko sonymen birge, «Baqytty otbasy» atty partııalyq jobaǵa da keńinen toqtaldy. Az qamtylǵan jáne kópbalaly otbasylardy qoldaý jónindegi bul joba aıasynda túrli is-sharalar qolǵa alynýda. - Oblysymyzda az qamtylǵan jáne kópbalaly otbasylardy qoldaý úshin 3,3 mıllıard teńge qarastyrylǵan, - dedi Nıkolaı Dychko. - Balalardy mektepke deıingi mekemeler tárbıesimen qamtý úshin 391,8 mıllıon teńge, oqýshylardy mektepterde tegin tamaqtandyrýǵa 824 teńge, al balalardyń jazǵy lagerlerde demalýy maqsatynda 305 mıllıon teńge bólinýde.
Óńirlik partııa uıymynyń tóraǵasy, oblys ákimi Bolat Baqaýov árbir partııa múshesine atalǵan jobalardyń mańyzdylyǵyn túsinip, olardy júzege asyrýǵa belsendi atsalysýdy buıyrdy. Sonymen birge bolashaq kezekten tys prezıdenttik saılaý jóninde de aıtty. - Ózderińizge málim, Memleket basshysy Qasym-Jomart Toqaev 9 maýsymda kezekten tys prezıdenttik saılaý ótetinin málimdedi, - deıdi Bolat Baqaýov. - Bizder birizdilik pen ishki jáne syrtqy saıasatymyzdyń turaqtylyǵyn tanytýymyz qajet. Elbasynyń áleýmettik baǵdarlamalaryn jemisti júzege asyrýdy jalǵastyrýymyz kerek. Ony halyqtyń saılaýda tikeleı daýys berýi arqyly oryndaýǵa bolady.
Kezekten tys prezıdenttik saılaýdyń mańyzdylyǵyn basqa da partııa músheleri aıtyp ótti. Konferentsııa sońynda «Nur Otan» partııasynyń HІH kezekten tys sezine Pavlodar oblysynan baratyn delegattardyń tizimi belgili boldy. Konferentsııaǵa qatysýshylar 23 sáýirde Nur-Sultanda ótetin sezge attanatyn partııanyń oblystyq fılıalynyń tóraǵasy Bolat Baqaýov bastaǵan 35 partııa múshesiniń kandıdatýralaryn qoldady.
